Beijing, Naitung:
Ki bor pyniaid ka China ha ka Sngi Nyngkong ki la iathuh ba kumba 10 ngut ki briew ki la khlad bad iwei ba dang sahkut hadien ka jinghap bad jingtwa ka tnum jong kawei ka jaka kilan met kaba don ha ka phang shatei lam mihngi jong ka China.
Katei ka jaka kilan met kaba don ha No.34 Middle School hapoh Qiqihar, kaba hap ruh hapoh jong ka thaiñ Heilongjiang, ka la twa ha ka por kumba 3 baje jong ka miet Sngi U Blei.
Tad haduh ka step Sngi Nyngkong, ki tnat iarap ki la ioh ban sei bad pyllait im ia 14 ngut kiba don hapoh jong katei ka jaka, napdeng jongki baroh, 4 ngut ki dei kiba la ioh sei khlem don dak jingmynsaw ne shah ktah eiei hynrei 6 ngut pat ki la khlad noh hapdeng jong ka jingsumar hadien ba la pynkit ia ki sha ki jaka sumar.
Katkum ki video ba la iohi lyngba jong ki camera CCTV kiba don ha katei ka jaka, la iohi ba baroh ka bynta ba shalor jong ka tnum katei ka jaka kilan met ka la twa bad hap noh bad kumta ki bor pyniaid ki la phah ia ki briew jong ka kynhun iarap ba kin leit ban sei bad pyllait im ia kat kiba don bad kiba sahkut hapoh jong katei ka jaka.
Palat 160 ngut ki briew jong ka tnat pynlip ding bad kumba 39 tylli ki trok pynlip ding ki la leit poi sha katei ka jaka tang mar ia ioh jingtip halor katei ka jingjia ha katei ka sngi.
Katkum ka jingwad bniah jong ki bor pyniaid, la shem ba ki nongtrei jong katei ka jaka, ki pyndait da ki kynja ïit kiba lah ban bthei kiba la pyndait ha ka tnum jong katei ka jaka kilan met.
La ong pat ruh ba dei namar ka jinglynshop jong u slap uba jur, kaba la pynïoh ksai ia kitei ki iit ba ki pait bad pynlong ruh pat ia katei ka tnum ba kan twa bad hap kumba ka jia mynta.
Ki pulit ki la bat noh ia kito kiba don bynta ha ka jingtei ia katei ka ïingmala naka bynta ban tohkit bniah ia ki haba iadei bad ki rukom tei ia katei ka jaka kilan met.
