Karimganj, Naitung:
Ka kynhun shipai Border Security Force (BSF), ha ka jingïatreilang bad ki pulit jong ka Karimganj distrik, ki la ïoh ban kurup ïa kumba 16,907 kilo u Burmese Supari uba la kot sha ka T. 1 klur na kawei ka trok ha Karimganj distrik, la ïathuh ki heh ba dei khmih ha ka Sngi U Blei.
Shuh shuh katkum ka jingïathuh jong ki pulit, la ong ba u nongñiah jong ka trok, ïa uba la tip kyrteng kum u Samsuddin, u la shahkem. “Ha ka por ba la don ka jingpyntreikam, ngi la ïoh ban kurup ïa u Burmese Supari uba 16,907 kilo na ka trok. Ngi la ïoh ruh ban kem ïa u nongñiah jong ka trok, ïa uba la tip kyrteng kum u Samsuddin. Ka dor ïew jong une u kwai supari uba la ïoh ban kurup la antad ba u la long da kumba T. 1 klur,”la ong u Partha Protim Das, uba long u Superintendent of Police, jong ka Karimganj distrik.
U Das u la pyntip ba ka kynhun ba la ïatreilang hapdeng ki shipai bad ki pulit, ha ka janmiet jong ka sngi Saitjaiñ, ki la lap ïa kawei ka trok, kaba don ïa u Registration Number NL-01AB-8938, ha ka thaiñ Badarpur jong ka Karimganj distrik. U la ong ba kane ka trok ka la thmu ban leit sha Guwahati. Ka jingtohkit ha kaba ïadei bad kane ka jingjia ka dang ïaid shakhmat.
