Kohima, Naitung:
Baroh 7 ngut ki MLA jong ka seng Nationalist Congress Party (NCP) ha Nagaland ki la pynpaw ba ki la ai ka jingkyrshan ïa u Ajit Pawar, ha kaba ka la long shi bynta ka jingktah jur ïa u kñi jong u, u Sharad Pawar.
Kane ka la jia khyndiat taïew hadien ba u Ajit Pawar bad phra ngut kiwei pat ki MLA jong ka seng NCP ki la leit ban pynïasoh bad ka sorkar synrop jong ka seng Maharashtra Shiv Sena bad BJP, ïa kaba la ïalam da u Myntri Rangbah u Eknath Shinde.
Da kane ka rai jong ki MLA, ka la don ka jingïapait hapoh ka seng NCP, ïa kaba la seng da u Sharad Pawar. Ha u snem 2019, ka seng Shiv Sena ka la pynkut noh ka jingïatreilang bad ka seng BJP bad thaw da ka sorkar Maha Vikas Aghadi ha Maharashtra ha ryngkat ka jingïatreilang bad ka seng Congress bad ka NCP.
Ka sorkar ka la khyllem noh ha u snem ba la lah hadien ba u Shinde u la pynpait ïa ka seng bad leit ban pynïasoh bad ka seng BJP ban ïoh thaw da ka sorkar kaba thymmai. U Sharad Pawar u la ïai ban da kaba ong ba u la long u nongïalam bashisha jong ka seng NCP, ha kaba ka la beh ïa kiba bun ki heh nongïalam kiba la leh ïa ki kam ba pyrshah seng.
