Aizawl, Naitung:
Ki shipai ki la pynkhlaiñ ïa ka jingpahara ha kiba bun ki bynta jong ka Mizoram ha ka Sngi U Blei ha shwa ban don ka jingïakhih kaba heh jong ki kynhun seng ki Mizo ban pyrshah halor ki jingïakynad kiba la jia ha Manipur bad ha ka por ba la ïoh jingtip ba ki la don ki Meitei kiba la sah ha ka jylla hadien ba la ïathuh da ka kynhun barim jong ki lehnoh, la ïathuh ki pulit.
Katba 78 ngut ki briew ki la leit sha Manipur ha ka sngi U Blei ha ki lai tylli ki liengsuiñ, ki la don 65 ngut ki briew kiba la leit sha ka jylla ba marjan ha ka sngi Saitjaiñ. Ha kaba ïadei bad kane, kam pat lah ban pynshai ïa mynta haduh katno ngut ki briew kiba dei ban leit jingleit lyngba ki liengsuiñ ki don ne katno ngut kiba la phet na ka jingsheptieng ban sah ha ka jylla, la ïathuh ki heh ba dei khmih.
Sa 41 ngut ki briew kiba dei ki Meitei kiba na Mizoram ki la leit sha Cachar distrik kaba don ha Assam da ki kali hadien ba ka kynhun lehnoh barim ka la bthah ïa ki ba ki dei ban mih noh na ka jylla hadien ba la saphriang ki Video jong ka jingshah pynïaid lyngkhuid jong arngut ki kynthei ha Manipur, ki la ong. Kumjuh ruh la ïathuh ba 31 ngut ki khynnah pule kiba dei ki Mizo na Manipur ki la leit phai sha Mizoram namar ka jingïai bteng jong ki kynrum kynram ha ka jylla, ki la bynrap.
