C. B. Iawphniaw
Kane ka long ka jingiohi haba bishar ïa ka rukom ai jait kheiñ jait kaba noh shiliang kaba shu shim tang ha ka kmie ha ri Khasi jongngi kan sa kylla ha kawei ka sngi, Balei namar katkum ka jingngeit ki mynbarim ka ai jait sha u kpa ne shynrang kan sa jop ha kaba khadduh.Namar wat ha ka jingngeit Khristan ruh u Blei u la thaw nyngkong eh ïa u shynrang bad hadien ïa ka kynthei. Te da lei lei ka kynthei kam lah ban long khlieh halor u rangbah lano lano ruh.
Ka dei ka hok ïa u rangbah ban bat ïa ka jait ka khong. Namar kane ka ai jait sha ka kmie ka dang mih hadien ba la wanrah ïa ka Sixth Schedule ka aiñ kyrpang ban ïada ïa ki riewlum rit paid. Hynrei shuwa ïa kane ki tymmen kiba la khlad noh ki iathuh ba ym ju don ba kylli phi ai jait ha u kpa ne ha ka kmie. Ki la ai jait katba ki sngew bit ban ai. Kumta ka sa don kane ka jingai jait kpa naduh mynshuwa.
Dei ynda la ioh ïa ka District Council ka sa don ka jingthaw ïa ka aiñ ba ïa ka jait ka khong yn ai noh ha ka kmie ym ha u kpa. Kane ka rukom ka long ruh ka jingleh shiliang ïa ki khun shynrang ka Bri u Hynñiewtrep ban ym shah ne ban shim ïa ka jait u kpa. Dei hadien ba la thaw ïa ka District Council. Lada ka long ha kane ka rukom ka bha ban pynduh noh ïa ka District Council ruh. Namar kam lah ban pynïoh ïa ka hok ïa baroh khlem ka jingleh shiliang ïa la u shynrang ne kynthei kumjuh.Namar ban ai jait Khasi ïa ki khun na ki kpa bym dei Khasi ka long sang ha ka jaitbynriew ka Bri u Hynñiewtrep, katba ïa u symbai Khasi paka la kyntait bym ai lad ban shim ïa ka jait kum ka dustur ka riti ka jaitbynriew. Kane ka dei ka jing-leh bym kheiñ briew ïa ki rangbah ka jaitbynriew Khasi – Pnar.
