Beijing, Naitung:
Katkum ka khubor na ki heh nongialam bapher bapher jong ka China ki iathuh ba ka ioh-ka kot jong kane ka ri ha kane ka kynti ka ap jingma haduh katta katta. Ia kane la kren ha ka jingiakynduh lang jong ki 24 ngut ki heh nongialam Politburo ha ka Lah Sngi U Blei.
La ong ba ka khubor kaba mih na katei ka jing-ialang ka kdew ia ka jingkynduh jingeh jong ka China ha ka liang ka ioh- ka kot ha kine ki sngi bad ka jingeh kaba khraw ka long namar ka jingbym biang ha ka khaïi-pateng la ka long hapoh ri ne kumjuh shabar ri.
La ong ba ki nongialam jong ka China ki ju iakynduh lang shisien shi snem hashwa ban kut u Naitung, kum shi bynta ban ïamir jingmut bad ban ia pyni ia ki jingeh bad jingkynduh jong ka ri hashwa ban ioh mad pat ia ka aïom kaba thymmai ha u Nailar.
Hynrei ka daw bah kaba pynlong ia ka China ban hiar ia ka ioh- ka kot ka long namar ka jingshah lynshop kaba jur ha ka khlam Covid-19 naduh ki 3 snem ba la leit.
Kumta, kitei ki heh ki la iakren bad ki wanrah ruh ia ka jingmaham ba ka China ka hap ban thaw lad- thaw lynti kumno ban pynkiew bad pynkhie im biang ia ka ioh- ka kot jongka da kiba bun ki rukom ha kiba bun ki liang.
Ia katei ka jingialang ba la pynlong ha katei ka sngi, la lam khmat hi da u President ka China- u Xi Jinping bad ha katei ka sngi u Jinping u la khot ia baroh ki tnat ba kin trei shitom ban pynïar shuh- shuh ia ka khaïi- pateng bad ia ki liang baroh kiba lah ban kyntiew ia ka ioh- ka kot jong ka ri ha ka por kaba khyndiat.
