Seoul, Naitung:
Ka tnat iada jong ka Japan ha ka Sngi Nyngkong ka la iathuh ba ka North Korea ka la pynher ‘namding biang wat hadien ka jingbyrngem kaba tyngeh na ka US bad South Korea ha kine ki sngi ba la leit.
La ngeit ba utei u ‘namding u la leit hap sha bar ki bynta ba shong ki riew paidbah jong ka Japan ha katei ka sngi.
Ka tnat shipai jong ka South Korea ruh ka la pyntip ba ka North Korea ka la ther ‘namding biang sha ki bynta jong ka duriaw Japan ha katei hi ka sngi.
La ong ba ka North Korea ka la shu pynher ‘namding khah-khah khlem da sngap shuh ia ka jingmaham jong ki ri ba marjan bad katei ka jingleh jong ka North Korea ka la wanrah jingma ia ki para marjan ri namar ka jingbym shngaiñ jong kitei ki ‘namding ba la siat da ka North Korea ha kine ki sngi.
Ha kajuh ka por la ong ba ka jingiadei hapdeng jong kitei ki 2 liang ki ri Korea, ka North Korea bad ka South Korea, ka la troiñ bha naduh ba ka North Korea ka la leh bym suit ñiew ia ki jingmaham jong ki ri ba marjan bad ka la sdang pyni bor da kaba pynher ‘namding man ka por khlem da pyrkhat shuh ia ka jingshah ktah jong kiwei pat ki ri.
Haba iadei bad kane, ka South Korea bad ka United States pat ki la iatrei lang da kaba pyn kilan bad pyntbit ia ki shipai jongki naduh ka tnat shipai liengsuiñ.
Katei ka jingther ‘namding jong ka North Korea ha kane ka por, ka long ruh hashwa ka jing-rakhe jong ka ia ka jingdap 70 snem ka jingkut noh jong ka thma Korea.
Shen ruh kawei ka kynhun ki nongialam ka China kan sa leit ban jurip sha North Korea ha kine ki sngi ban wan naka bynta ki jingiatrei lang ha ki por ban wan.
