Ka jingshah kem jong palat 20 ngut ki briew ha ki pulit ka West Garo Hills shi sngi hadien ba ka la don ka jingkawang maw na ka liang u paidbhur ïa ka shlem treikam u Myntri Rangbah ka jylla ha Tura, ka pyni ba ka don pynban ka kam saiñpyrthei. Ha ka step jong ka Sngi Ba-Ar, ki pulit ka West Garo Hills ki la pyllait ïa ki kyrteng jong ki 18 ngut kiba la shah kem, 16 ngut ki shynrang bad 2 ngut ki kynthei, la ai lang ïa ki seng saiñpyrthei kiba ïadon bynta. Na kita ki 18 ngut, la kdew ba 11 ngut ki dei ki dkhot ka seng All India Trinamool Congress (AITC) bad 2 ngut na ka BJP. Kham hadien, ki pulit ki la rah sa ïa u nongïalam ka AITC, u Richard Mrong Marak, uba dei ruh u kyrtong ka seng ha ka ilekshon MLA na South Tura pyrshah ïa u Myntri Rangbah, u Conrad K Sangma. Ka jingpyni jong ki pulit ïa ki kyrteng jong ki seng saiñpyrthei jong kitei kiba la shah kem, ka pynpaw ba ka don ka kam saiñpyrthei ha kaba ïadei bad ka jingïakawang maw ha Tura kaba la ïalam sha ka jingmynsaw jong kiba bun ngut ki pulit.
Ki seng kiba la ïashong jingïalang bad u Myntri Rangbah hynnin ka sngi ki la kyntait ba kitei kiba la kawang maw ki don bynta bad ki. Ka jingpaw kyrteng jong ki nongtrei/nongkyrshan ka seng TMC bad BJP ka pynsuba ba ki pulit ki la lap ba ka don ka jingleh saiñpyrthei ha kaba ïadei bad katei ka jingjia. Kaei kaba ngi lah ban suba ka long ba kiba la leit pynkulmar ki dei na ki seng kiba pyrshah ïa ka National People’s Party (NPP) bad ym satia u paidbhur uba la shu mih kynsan-kynsan. Lada ka jingtohkit kan long kaba beit bad ka bym shah liang, lehse ki lah ban mih bun kiei-kiei ha kaba ïadei bad katei ka jingjia. Ka lah ban don ka jingleh saiñpyrthei ha kaba ïadei bad katei ka jingjia na ka daw ba ka NPP ka don ha ka liang synshar katba ka BJP, watla ka don lang ha ka sorkar, ka ju takraiñ ïa ka NPP na ka por sha ka por bad ha kawei pat ka liang, ka TMC ka don ha ka liang pyrshah. Tangba ngi dei ruh ban tip la ka dei ne em kaba shisha ba kita ki seng, BJP bad TMC, ki la phah ïa ki nongkyrshan jong ki ban leit kawang maw ïa katei ka jaka ba la pynlong jingïalang. Kane ka dei ruh ka sien banyngkong ha ka jylla ba ki pulit kin kdew ba ka jingkulmar ka don bynta bad ka saiñpyrthei. Hynrei ngin ban biang ba dei tang ka jingtohkit kaba beit bad ka bym shah liang kaba lah ban pyni shai kano kaba dei bad kano kaba lait.
Hynrei baroh ngi dei ban pynrem ïa kaei kaba la jia. Ha ka jingsynshar paidbah, baroh ngi don ka hok ban pynpaw ïa ka jingsngew tangba kam mut pat ba ngin leit pynkulmar shnong ne kawang maw ne ktah kti ïano-ïano. Ka don ka lynti ban ïakren ne ban leit mudui sha ïingbishar lada ym sngewhun ïa kano-kano ka kam kaba ïadei bad ki paidbah. Ban shu pynkulmar shnong, kan pynjngut ïa ka jingïakhih. Ngi la ïohi kumno ka Voice of the People Party (VPP) ka la lah ban teh lakam ïa kino-kino ki jingkulmar ha ka por ba u President ka seng, u Bah Ardent Miller Basaïawmoit, u la shong shah thngan hajan Secretariat ha kine ki khyndiat bnai ba la leit noh. Kane ka seng ka la lah shisha ban pynjai-jai ïa ki paidbah bad kam shym la mih kano-kano ka huri-hura. Lada mih ka jingkulmar, khlem pep kito ki jingdawa baroh kin shu long lehnohei bad ka jingmut jingpyrkhat kan phai noh sha kita ki jingkulmar. Ngi dei ban ïaroh bad shim nuksa na ka VPP kumno ka pynïaid ïa ki kam ki jam ha kato ka por hapdeng ka jingwantuid u paidbah byllien na kylleng sawdong ka Ri Khasi Jaiñtia.
Kumba ka long mynta, kam don shuh kano-kano ka jingjia ka ban pynthut ïa ka shongsuk shongsaiñ ha Tura wat la ki bor distrik bad pulit ki dang peit pyrman. Ka korphiw ha ka por mynmiet ka dang ïaid bad lehse yn sa weng noh ha kine ki sngi lada kam don shuh ka jingjia ka ban ktah ïa ka suk ka saiñ. Kino-kino ki jingjia kiba ktah ïa ka suk ka saiñ ka buh jingeh ïa ki nongshong shnong kiba lui-lui bad ki duk ki suk. Lada ïakhih tang shi kynta ne shi bnai ruh, ki ban ïap nyngkong ki dei ki baduk bad im jakpoh da kaba kamai mynsngi bad bam mynmiet. Ngi kyrmen ba kiei-kiei baroh kin poi sha ka suk ka saiñ khnang ba ki nongshong shnong baroh ki lah ban ïaid ban ïeng kumba ju long khlem jingtieng jingsyier. Ha kajuh ka por, ka sorkar ka dei ban sngap ban pynbeit ïa ki jingeh kiba ki nongshong shnong ki wan ban ud ban nam khlem da peit shiliang khmat ïano-ïano namar ka dei ka kamram jong ka sorkar ban trei hok kumba la pynkhamti da ka Riti Synshar.
