London, Naitung:
Katkum ki khubor la ong ba u Anjem Choudary, uba long u nongialam ka jaitbynriew Islamic un shah hajir hakhmat ka ïingbishar jong ka London ha ka Sngi Nyngkong. U Choudary u long u nongshong shnong jong ka Britain bad Pakistan, ia uba dang shah pyllait shen na patok ha kine ki khyndiat snem ba la leit ha ryngkat bad 3 tylli ki kyndon ba la pynngat ia u haba iadei bad ki kam thombor jong ki lehnoh.
U Choudary u la don 56 snem ka rta bad u la shah bat biang ha ka tnat pulit Metropolitan Police ha ka Sngi U Blei halor ka jingdon jing-iadei jong u bad la kynhun lehnoh ba la shah khang, ha kaba la ioh jingtip ba utei u nong-ialam u la leit kynduh bad ki nongialam jong katei ka kynhun lehnoh ban ai jingkyrshan ruh ia ki ban pynjur ia ki kam thombor nangne shakhmat.
Kumjuh ruh la iathuh ba uwei u nong Canada, ia uba la ithuh kum u Khaled Hussein 28 snem ka rta, u la shah kem lang halor ka jingiadon kti jong u bad ki kynhun lehnoh ba la shah khang.
Ha ka 17 tarik u Naitung, ka kynhun pulit Met Counter-Terrorism ka la pyntip ba ka la kem noh ia uwei u rangbah 56 snem na East London bad kumjuh ruh ia u samal 28 snem na Canada na ka Kad liengsuiñ Heathrow Airport hadien ba u wan poi da ka liengsuiñ ha katei ka jaka.
Ia kitei ki 2 ngut la pynngat ha ki kyndon pynkheiñ aiñ kiba hap hapoh ha ka Section 41 jong ka Terrorism Act 2000 bad la rai ban nym pyllait jamin ia ki katba ki dang don hapdeng ka jingtohkit bniah haba iadei bad ka jingsuba don kti jongki ha kitei ki kam thombor jong ki lehnoh.
La ong ba u Choudary u dei u ba la iadon kti bad ki kynhun lehnoh bapher, kynthup ia ka kynhun lehnoh Islamic ka Al Muhajiroun kaba dang shah khang noh shen.
La pyllait ia u na ka patok Belmarsh ha u snem 2018 ha kaba u la shah kem bad shah rai set patok ha ka ïingbishar na Old Bailey hapoh London hi, ha u Nailur jong u snem 2016 namar ka jingtan jong u ia ki jaitbynriew Muslim ban iasnoh kti lang bad ka kynhun lehnoh ISIS.
