Stockholm, Naitung:
Kawei ka samla nong-iashim bynta ha ka jing-iakhih na ka bynta ka jingkylla ka suiñ bneng hapoh Sweden, ka Greta Thunberg ka la shah daiñ kuna namar ka jingbym kohnguh ia ka jingbthah jong ki heh pulit ban mih noh na katei ka jaka ïakhih ba ka shong ha ki bynta Shathie jong ka Malmo ha ka 19 tarik u Jylliew.
Kumjuh ruh na ka liang jong ka Greta ka la phla ba katei ka jingkynnoh jong ki pulit ba kam shym kohnguh ia ka jingbthah jong ki ka long kaba dei. Hynrei ka la ong pat ba kam shym la leh ia kaei- kaei kaba bakla hynrei ka leh ia kaei kaba sngew donkam watla kam shym kwah ban pyn kohnguh ialade hakhmat ki pulit.
Haba la rah ia ka sha ka ïingbishar, katei ka samla ka la ong ba ka jing-iakhih jongka ha kane ka kynti ka long na ka bynta ka jingshngaiñ bad ka jing-iada na ka bynta ki jingthaw ba don jingim baroh namar ka la ong ba ka jingkylla jong ka suiñ bneng ka la wanrah jingma bad kan ktah jur ruh ia ka koit- ka khiah bad ka jinglong- jingman jong ki jingthaw ba don jingim ha ka pyrthei ha kum kine ki sngi ba mynta. Kumta ruh ka la ong ba baroh ki jingthaw ba don jingim, khamtam eh ia u khun bynriew, ka jingkylla ka suiñ bneng ka la wanrah jingma shibun eh, watla ka long ka ban sa ktah suki-suki lane kaba ki briew ki hap ban mad noh mynta ruh.
Katei ka jingdaiñ kuna pyrshah ia ka, kan long ruh katkum ka jingioh bad ka rukom kamai jongka, hynrei haduh mynta ka ïingbishar kam pat shim rai haduh katno kan hap ban siew naka bynta katei ka jingshah daiñ kuna.
Ka Greta Thunberg ka long kawei napdeng katei ka kynhun kaba la leit ban shong ïakhih ha katei ka jaka, ha kaba ka la wanrah ruh ia ka jingkhang lynti bad ka la pynthud ia ka leit- ka wan jong ki trok kit umphniang ha Malmo. La bat bad rai ban daiñ kuna ia ka namar ka jing bym kohnguh ia ka jingbthah jong ki pulit ba ka dei ban kynriah noh na katei ka jaka.
