Jowai, Naitung 26:
Ka Royal Pole Mihmyntdu bad ka Mulang Ïalong ki la khur jingjop ha ka lympung ïalehkai Third Division Football Tournament ba la pynïaid da ka West Jaiñtia District Sports Association (WJDSA).
Kane ka la wan hadien ba ka Royal Pole Mihmyntdu ka la pynliem noh ïa ka Nangbah Khlopanoo da 3-1 kol bad ka Mulang Ïalong ka la pynliem ïa ka Lumpyrtuh Mihmyntdu da 2-0 kol ha ka sngi Balang ha madan Kiang Nangbah Stadium Ladthadlaboh, Jowai.
Ïa ki lai tylli ki kol jong ka Royal Pole Mihmyntdu la thep da u Pynchai Chullet ha ka minit kaba 5 & 14 bad u Marsanki Suchiang u la thep ha ka minit kaba 44. Katba ka shi kol jong ka Nangbah Khlopanoo la thep da u Aiban Lamare ha ka minit kaba 64.
Ha ka jingïakhun kaba bud, ka Mulang Ïalong ka la pynliem ïa ka Lumpyrtuh Mihmyntdu lyngba ki ar kol ba la thep da u Tellmi Mulieh ha ka minit kaba 50 bad u Challet Phawa ha ka minit ba 64.
