Bern, Naitung:
Ha kane ka khubor la ong ba ka ‘erïong kaba khlaiñ ka la leit ban iaid lyngba ia ka shnong La Chaux-de-Fonds kaba don sha ka phang Northwest jong ka Switzerland ha ka Sngi Nyngkong. Ha kane ka jingjia iwei i la khlad noh bad kumba 15 ngut pat kiba ngat ha ka jingmynsaw.
La ong ba watla katei ka ‘erïong kam shym la neh slem than eh hynrei ka jing jur bad jingkhlaiñ bor jongka, ka la pynjulor ia shibun ki iing briew bad ki jingtei ha kylleng jong katei ka thaiñ kynthup ia ki kali, ki tnum iing bad ki dieng ruh ki la shah sei bad khyllem lut ha katei ka lyer. Nalor kane, wat ki rukom treikam jong ki tnat rel bad ki bos ba dei khmih ia ka leit- ka wan jong ki paidbah ruh ki la thud lut.
Shuh shuh ruh la ong ba ka jingkhlaiñ jong katei ka ‘eriong ka la poi kumba 217 km/h katkum ba la ioh ban peit thuh ia ka jinglong jingman ha La Chaux-de-Fonds ha katei ka step Sngi Nyngkong.
