Ki Dorbar Shnong ha Rilum Khasi Jaiñtia ki dei kiwei na kiba kongsan tam ha ka synshar ka khadar bad ka jingpynïaid ryntih ïa ki kam ki jam ha shnong ha thaw. Lada dei ha sor ne ha nongkyndong, ki Dorbar Shnong kiba trei smat bad kiba khlaiñ ki lah ban wanrah jingshngaiñ katba ki Dorbar Shnong kiba alhia bad ba tlot, ki buh jingma kylla ïa ki nongshong shnong. Ngi la ïohi na ka por sha ka por ba haba ki Dorbar Shnong ki khlaiñ, ki shnong ki thaw ki don hapdeng ka suk ka saiñ bad ki briew kiba nabar ruh kim nud ban wan thaw jingkulmar ne ban leh ïa ki kam sniew kam smeh. Lada ki tlot, ka jingwanrung kyrthep jong ki briew kiba nabar kynthup ki bar jylla ka shyrkhei bha namar ym don ba peit ïa ka leit ka wan lane ka rung ka mih jong ki briew.
Ha ka Sngi Ba-Ar, ka Executive Committee jong ka Khasi Hills Autonomous District Council (KHADC) ka la rai ban wanrah katto katne ki jingpynkylla ha ki aiñ kiba la don lypa na ka bynta ban pynkupbor ïa ki shnong bad bthah ïa ki ban pynrung kyrteng ïa ki nongshong shnong bad ithuh ïa ka rung ka mih jong ki na ka bynta ka jingshngaiñ jong ka jaitbynriew. U Deputy Chief Executive Member (ka KHADC u Bah Pynshngaiñlang N Syiem u la ong ba ka Executive Committee kan wanrah ki jingpynkylla hapoh ka aiñ Elaka Administration Act, Appointment and Succession of Chief and Headmen Act, 1959, Appointment of Syiem and Deputy Syiem bad lyngba kine ki aiñ, yn aibor ïa ki bor shnong ban lum jingkheiñ ïa ka jingdon ki briew khnang ban tip ïa ki briew kiba wan nabar.
U Deputy CEM u la ong ba katba ka sur jingdawa ban ïoh ïa ka ILP kam pat urlong, kan long ka jingïarap lada pynbha ïa kine ki aiñ kiba la don lypa lyngba ka bor shnong bad Hima ban tehlakam ïa ka jingwan kiba nabar bad ithuh ïa kiba dei ki nongshong shnong bad kiba shu wan trei bylla. Shuh shuh u la ong ba ka jingeh namar u drok ka dei kaba khia bha bad ka Executive Committee ka sngew dei ban shimkhia bad bthah ïa ki bor shnong da kaba pynïadei ruh bad ka jingïakhun pyrshah ïa u drok da kaba shim ruh ïa ki aiñ ka Sorkar Pdeng kiba ïadei bad ka jingkhaïi drok.
Kane ka long ka sienjam bakongsan ba ka KHADC ka la shim namar kat nang mih ki sngi, ki kam sniew ruh ki la nang jyllei khamtam ka jingkynrei jong u drok. Ka jinglah ne ka jingbymlah ban ïakhun pyrshah ïa u drok ka shong ha man la kawei pa kawei ka longïing longsem. Lada ngi kheiñ ïa ka longïing longsem kum ka kynja baïar, ka Dorbar Shnong ka dei kaba wan hakhmat eh. Ka Dorbar Shnong ka dei ka nongri nongsumar ïa ki shnong ki thaw ha ka Bri U Hynñiewtrep bad lada ka khlaiñ, ki nongshong shnong ruh kin shngaiñ. Ngim ong ba ki Dorbar Shnong ki dei ban shim ïa ka aiñ ha la kti ban pynshitom ne shoh ïa ki nongkhaïi lane nongdih drok, hynrei lada ki peitngor bha, ki lah ban ïarap ïa ki bor jong ka aiñ ban kem ïa kiba kum kine ki briew. Ngi dei ban sngewthuh pat ba ki nongdih drok ki donkam ïa ka jingsumar bad jingïasyllok da ki briew kiba la shemphang ha ka kam katba ka ruh nar ka dei ban ap lypa ïa ki nongdie.
Ka Dorbar Shnong ka dei ruh ban ïoh ïa ka jingïatreilang jong baroh ki nongshong shnong khnang ba lada don kano kano ka jingjia, yn lah ban ïa tur khlem buh teng. Ngi sngewthuh ba ki shnong ki thaw khamtam ha khap sor ki la nang ïar. Ka jingbun ki briew ka la shyrkhei. Kam dei kaba suk ïa ki Dorbar Shnong ban teh lakam ïa kawei pa kawei ka kam. Hynrei donkam ïa ka jingïatreilang jong baroh ba ngin ïa lait na ka saw ka sian bad ki jingma kiba shyrkhei kiba ap thap khamtam ïa ki samla samhoi. Ka longïing longsem kaba khlaiñ ka pynthikna ba ka lawei ruh kan long kaba khlaiñ bad ba shngaiñ. Lada bakla na ïing, la bakla lut nadong shadong. Namarkata, baroh ngi donkam ban ïa pynkhlaiñ ïa la ka ïing ka sem (Dorbar Shnong) khnang ba ngin lah ban ïakhun ïa ki jingeh kiba la wan tyllep ïa ki shnong ki thaw, imlang-sahlang bad ka jaitbynriew.
