Washington, Naitung:
U Secretary of State jong ka United States, u Antony Blinken, ha ka Sngi Balang u la ong ba ka United States ka khmih lynti ia ka jingiadei kam kaba beit- ba ryntih bad u Myntri ka tnat kam bar ri ba thymmai jong ka China hadien ka jingshah weng noh jong u Qin Gang na katei ka kam ha kine ki khyndiat por ba la leit.
Namar u la ong ruh ba u la ju ia ithuh- ithaw bha bad u Wang Yi la kumba 10 snem eiei bad u la ju ia kynduh ruh bad u na ka por- sha ka por. Kumta ruh u la ong ba ka jingiadei kam bad u ha kane ka bynta kan iarap ban pyniaid beit- pyniaid ryntih ia ki kam ki jam bad kan nang kham pynbha shuh shuh ia ki kam ki jam ha kine ki sngi ban wan.
Hynrei, u la ong ba watla ka China kan thung thymmai da uno- uno ruh u briew, hynrei na ka liang jong u, un kloi ban plie lad bad ban iatrei lang khnang ban wanrah ia ka bha ka miat ha ka jingiadei hapdeng ka United States bad ka China.
Shuh shuh ruh u Blinken u la ong ba ka long ruh ka hok jong ka China ba kan weng ne thung ia ki Myntri jongka, namar kumba la sakhi ruh, ym ju kham iohi shuh ia u Qin ha man ki kam paidbah naduh ka 25 tarik jong u Jylliew ba la leit.
Watla katta, ym shym la ioh jingtip eiei shaphang ka jingjah jong u Qin na ki kam paidbah hynrei kane kan shong tang ha ka jingpyniaid jong ka China hi bad na ka liang jong ka US kam shym don jingthud ne jingwit eiei.
