Nablus, Naitung:
Ka tnat ka koit ka khiah jong ka Palestine ha ka Sngi Balang ka la pyntip ba 3 ngut ki nong Palestine ki la shah siat iap ha ki shipai ka Israel ha ki bynta jong ka West Bank ha ka Sngi Ba-ar. Kane ka dei ruh ka jingïakynad kaba hadien duh ha katei ka thaiñ naduh ba la ioh mad ia shibun ki jingïakynad bad jingiasiat iap markylliang ha u snem ba la leit.
Ka tnat shipai na Israel ka iathuh ba dei kitei ki 3 ngut ki lehnoh jong ka Palestine kiba ther kuli nyngkong sha ka kynhun shipai ha ka por ba ka kali ba ki shong ka leit iaid lyngba na Nablus bad hadien kata, ki shipai ka Israel ki ia pynphai kylliang tad haduh ba ka jingiasiat kan da kut hadien ka jing kyllon iap jong kitei ki 3 ngut ki lehnoh ka Palestine ha katei ka jaka.
Ki shipai ka Israel ki la ioh kurup noh ia katto- katne ki suloi M-16, kawei ka suloi rit, ki kuli bad kiwei kiwei de ki tiar siat ba la kit da kitei ki nong Palestine ha katei ka sngi.
Ka Israel ka la ioh kurup ia ka West Bank naduh ka sngi ba hynriew (Six-Day) jong ka thma ha u snem 1967.
Shuh shuh la ong ba naduh u snem ba la leit, katei ka bynta khappud jong ka Israel bad Palestine, ka la don hapdeng ka jing bym shngaiñ namar ka jingsdang pyni bor jong ki bor pahara ka Palestine sha ki jaka treikam jong ki shipai ka Israel na ka por- sha ka por bad hadien kata pat ka Israel ruh ka la ther markylliang ban pynhiar kput ia ka jingleh jong ki shipai ka Palestine.
Ka West Bank ka don ia kumba 3 Million ngut ki paidbah nong Palestine bad kumba 4,90,000 ngut ki paidbah nong Israel kiba sah ha ki jaka ba la kynnoh ba ki long ki jaka ba la shu sah be-aiñ da ki paidbah nong Israel.
