Shillong, Naitung 27:
Ka Manchester United bad ka Arsenal ki lah ban pynurlong ïa ka jingangnud ban ïoh ïa u Kylian Mbappe uba la thmu ban mih noh na ka Paris Saint-Germain, wat la ki khubor ki la ïathuh ba ka Real Madrid kam pat shym la ïakren eiei ban soi ïa utei u rangïalehkai shakhmat.
U Mbappe u dang ïai kyntait ïa ka kontrak jong ka PSG kaba la thmu ban pynjlan na u 2024 shaduh u 2025. Kumba ka paw ka PSG kam shym la don jingthmu ban pyllait noh ïa u ha u snem ban wan bad dei na kata ka daw ba ka kwah ban pynthymmai biang ïa ka jingïateh soskular kaba thymmai.
Utei u kapten ka France um shym la kwah shuh ban dang ïai pynbeit ïa ki kyndon kiba thymmai bad dangshen ka PSG ka la thmu ban die noh ïa u. Kumta na ka liang ka Saudi Arabian Public Investment Fund (PIF) ka la ïohi ba kane ka long ka kabu kaba biang eh na ka bynta ban ïakren ïa u Mbappe ban leit ïalehkai noh sha Middle East.
Kumta na ka liang ka Al Hilal ka la phah ka jingtyrwa ha ka dor kaba €300m (£259m) na ka bynta u Mbappe. Ka PSG ka la pdiang bad ka la pynpaw ba ka Al Hilal ka lah ban ïakren bad utei u rangïalehkai shakhmat na ka bynta ka kontrak.
Lada u Mbappe un leit pynïasoh un long u rangïalehkai uba rem dor tam na baroh. Ka rekod kaba u Mbappe u ïoh bad u Neymar na ka PSG, ka long £200m hadien ba u la mih noh na ka Barcelona ha u Nailar jong u snem 2017.
Wat la ka Al Hilal ka la khreh ban ïamynjur bad katei ka kynhun u Luis Enrique, hynrei kan long kaba eh ba u Mbappe ba un leit ïalehkai sha ka Saudi Pro League. Un kwah ban ïalehkai ha ki lympung ïalehkai kiba heh ha ka kam ïalehkai ka jong u, khnang ba un lah ban pynurlong ban khur ïa ka khusnam Ballon d’Or ha ka sien nyngkong bad kiwei pat ki khusnam.
tang kawei kaba lah ban pynkohnguh ïa u long tang lada ka Al Hilal ka la buh ka jingtyrwa ha ka dor kaba heh duh na ka bynta kane ka aïom ha shwa ba un leit ïasoh sha ka Madrid kum u rangïalehkai ba la laitluid ha u 2024.
Kumba ka paw mynta ka Madrid ka lah ban soi noh ïa utei u rangïalehkai ba dang 24 snem ka rta. Te kumta une u rangïalehkai u kwah ban tyngshaiñ kumba long u Cristiano Ronaldo ha ka Bernabeu bad ban ïarap ban pynurlong ïa ka Los Blancos ba kan khur jingjop ha ka Champions League bad kumjuh ha ka La Liga.
Hynrei ki khubor na France ki la pynpaw ba ka Madrid kam pat shym la ïakren eiei na ka bynta utei u rangïalehkai. Lada ka urlong kan long ka jingplie lad ïa kiwei pat ki klob jong ka Premier League kum ka Man Utd and Arsenal ban soi ïa u Mbappe.
