Shillong, Naitung 27:
U ’rangïalehkai shapdeng ka England bad Liverpool u Jordan Henderson u la pynïasoh ïalade sha ka kynhun ïalehkai Saudi Pro League, ka Al-Ettifaq, la pynbna da kitei baroh ar klob ha ka sngi Palei.
Kat kum ki khubor na England la ong ba ka Al-Ettifaq kan siew kumba 12 million pounds ($15.55 million) bad kiwei pat ki jingsiew na ka bynta u Henderson, u ban pynkut noh ïa ki 12 snem kiba u la don ha Anfield.
Utei u rangïalehkai ba la 33 snem ka rta un ïohpdiang ïa ka jingsiew kumba 700,000 pounds man ka taïew, la ong ki khubor.
Ïa u Henderson la leh burom khatduh da ki paidbah nongkyrshan ka Liverpool lyngba ka dur khih (video) ba la buh hapoh ka ‘social media’ ha ka sngi Balang.
“Ka long kaba eh ban pynpaw ïa ki kyntien ai khublei khatduh ha kane ka jingïaid lynti ha ki 12 snem bad ka klob. Ngan ïai long borabor u nongkyrshan jong ka Liverpool haduh ba ngan da ïap. Khublei shibun ïa kiei kiei baroh bad phin ym ïaid marwei,” la pynpaw utei u rangïalehkai ha ka Instagram lajong.
U Henderson un ïasoh lang ha ka Al-Ettifaq ryngkat u para nongïalehkai barim ka Liverpool u Steven Gerrard, uba la shimti kum u coach na ka bynta ka kontrak kaba lai snem naduh kaba sdang jong une u bnai.
U Henderson u la poi ha Liverpool ha u snem 2011 na ka Sunderland. Nangta u la ïoh ban shimti kum u kapten hadien ba mih noh u Gerrard, uba la leit ïasoh sha ka Los Angeles Galaxy ha u 2015.
Kumba ka paw u Henderson u la ïoh ban ïalehkai kumba 500 sien na ka bynta ka Liverpool ha baroh ki lympung ïalehkai. U la ïadon bynta ruh ban khur jingjop ha ka Premier League, Champions League bad kumjuh ha ka FA Cup, ar sien ha ka League Cup, Club World Cup bad ka UEFA Super Cup.
