Jowai, Naitung 27:
U Dangri Phawa u la ïoh ïa ka hat-trick na ka bynta ban pynlong ïa ka Madankynsaw Mawkyndeng ban khur ïa ka jingjop ha ka lympung ïalehkai 3rd Division Football Tournament (3rd Adelbert Laloo Memorial Trophy) ha ka sngi Palei ha madan Kiang Nangbah Stadium Ladthadlaboh, Jowai.
Ha kane ka lympung ba la pynïaid da ka West Jaiñtia District Sports Association, ka Madankynsaw Mawkyndeng ka la pynliem ïa ka FAM da 7-1 kol.
U Dangri Phawa uba la khur ïa ka hat-trick, u la khyrwit haduh saw kol ha ka minit kaba 19, 45, 56 & 65. Katba ïa kiwei pat la thep da u Damechan I Saioo ha ka minit kaba 13, u Philemin Lamare (54) bad u James Edison Suchiang (55).
Haba phai sha kawei pat ka jingïakhun kaba la long kham hashwa, ka Mookaswan ka la pynliem noh ïa ka Kseh Sylle Ïalong da 3-2 kol. Ïa ki kol jong ka Mookaswan la thep da u Buhpormi Myrboh ha ka minit kaba 4, u Slim Myrboh haka minit kaba 38 bad u Shailang Lawai haka minit kaba 56. Katba ki ar kol jong ka Kseh Sylle Ialong la thep da u Niawki Phawa haka 27 minit bad u Wanbait Suchiang ha ka 30 minit.
