Jowai, Naitung 27:
Ka Madankynsaw Mawkyndeng ka la khur ïa ka jingjop ha ka lympung ïalehkai Independence Day Cup Under-17 Football Tournament ba la pynïaid da ka West Jaiñtia District Sports Association.
Kane ka nam jop ka la wan urlong hadien ba ka lah ban pynliem noh ïa ka NSA da 5-1 kol. U Nidaroi Mulieh u la khur ïa ka hat-trick bad kane ka jingïalehkai ka la long ha ka sngi Palei ha madan Kiang Nangbah Stadium Ladthadlaboh, Jowai.
Ïa ki kol jong ka Mulang Ïalong la thep da u Charelang Mulieh ha ka minit kaba 15, u Tushar Pale ha ka minit kaba 19 bad u Nidaroi Mulieh u la thep lai kol ha ka minit kaba 33, 48 bad 60+1. Katba ïa ka shi kol jong ka NSA la thep da u Teidiroi Dhar ha ka minit 12.
Haba phai sha ka jingïalehkai kaba bud hapdeng ka Evergreen Mukhla bad Panaliar ki la ïasam mar shi dor-thong (point) hadien ba ki ïakhaid mar 1-1 kol. Ïa ka kol jong ka Panaliar la thep da u Deisakiru Nanghuloo ha ka minit kaba 18, hynrei ka Evergreen Mukhla ka la pynphai kylla ha ka minit kaba 50 lyngba u Pynshaimiki Sana.
