Shillong, Naitung 27:
Ki ar tylli ki skul na East Khasi Hills bad East Jaiñtia Hills ki la jam sha ka final ha ka lympung ïalehkai State Level Subroto Mukherjee Football Tournament ba la pynïaid da ka tnat ïalehkai ka Sorkar Jylla.
Kine ki kynthup ïa ka Assam Rifle Public School (Under-17 boys) bad ka Ïewrynghep Secondary School (U-17 girls) kiba na East Khasi Hills, katba na East Jaiñtia ki long ka Rymbai Presbyterian HSS (Under-17 boys) bad ka K.B. Memorial Secondary School (Under-14 Boys).
Ha ka jingïakhun semi final jong ka Under-17 ki shynrang kaba la long ha SAI Training Centre ha ka sngi Palei, ka Assam Rifle Public School ka la lah ban pynliem noh ïa ka Sibsing Memorial Govt. HSS na West Khasi Hills lyngba ka tie-breaker da 3-2 kol hadien ba kine ki kynhun ki la ïakhaid mar shi kol.
Ka Rymbai Presbyterian HSS na East Jaiñtia Hills ka la jop da 2-0 kol ïa ka Okkapara Secondary School na South West Garo Hills. Ïa kine kol la thep da u Bankerbha Dkhar lyngba ka penalty ha ka minit kaba 23 bad ïa kawei pat da u Besterly Ksih (38).
Ha ka semi final jong ka Under-14 ki shynrang kaba long ha katei kajuh ka madan ïalehkai, ka K.B. Memorial Secondary School na East Jaiñtia Hills ka la jop da 2-0 kol ïa ka Mari Apal, UPS, Mangsang kaba na East Garo Hills. Ïa kine la thep da u Ebiangmi Siangshai ha ka minit kaba 17 bad ïa kawei la ïarap pynthep da u rangïalehkai ka Mari Apal u Griksrang Marak (60).
Katba ka Myngken HSS na Ri-Bhoi District ka la shah rem noh ha ka H.K. Sing Secondary School na West Jaiñtia Hills da 3-2 kol. U Budmi-ha-oo Mukhim u la thep ar kol na ka bynta ka H.K Sing ha ka minit kaba 3 & 60 bad ïa kawei pat la thep da u Kynsai-I-manmi War (20). Na ka Myngken la thep da u Me-uba-ai la thep da u (41) bad u Chanjib Chettri (54).
Haba phai sha ka U-17 ki kynthei, ka Saiden Secondary School na Ri-Bhoi District ka la pynliem noh ïa ka Sibsingh Memorial Govt. Sec. School na West Khasi Hills lyngba ka tie-breaker da 4-2 kol hadien ba ïakhaid mar shi kol.
Katba ka Ïewrynghep Secondary School na East Khasi Hills ka la jop haduh 4-2 kol ïa ka North Liberty HSS na West Jaiñtia Hills. Ka Larihun Songthiang ka la thep ar kol na ka bynta ka Ïewryngkep ha ka minit kaba 4 & 21, katba ïa kiwei pat la thep da ka Melaribha Lyngdoh (25) bad ka Sodawanki Suchiang (42)
Te kumta kine baroh ki kynhun kiba la khur ïa ki jingjop kin pynkhreh ïa ban ïakhun final ha ka sngi Thohdieng ha SAI Traning Centre na ka bynta ban ïaknieh ïa ka nam lahduh.
