Japan, Naitung:
Kawei ka briew ha ryngkat bad ki bahaïing ki la shah kem noh ha ki pulit ka Japan hadien ka jinglap ia ka metïap jong uwei u briew u bym don khlieh shuh hapoh ka kamra jong ka ‘Love Hotel’.
Ka tnat pulit jong ka nongbah Hokkaido kaba don Shatei jong ka Japan, ha ka Sngi Ba-ar ka la iathuh ba la ioh ban kem noh ia ka Runa Tamura (29 snem ka rta), ha ryngkat bad u kpa jong ka- u Osamu Tamura (59 snem), ki la shah kem noh ha katei ka sngi halor ka jingsuba don kti ha ka jingpyniap ia utei u briew hapoh ka kamra jong katei ka hotel kaba la jia ha ki 3 taiew ba la leit bad ka lah ban long ha ki 1 tarik lane 2 tarik jong u Naitung. Kumjuh ruh ki pulit ki la kem biang sa ia ka kmie jong katei ka samla hadien ba la lap ia ka khlieh jong utei u briew ba la shah pynïap na ka iingsah ka kmie jong katei ka samla.
Ia utei u briew ba shah pynïap la ithuh kum u Hitoshi Ura, uba la don 62 snem ka rta. La lap ia ka metïap jong u na ka dabor sum ‘Bathtub’ hapoh ka kamra sum jong katei ka iing hotel ha ka 2 tarik jong une u Naitung, ha kaba ym don shuh wat tang iwei ruh i tiar jong u ha katei ka kamra ba u sah namar wat ka jingthiah ruh ka neh kumjuh khlem pat don ba pyndonkam ne thiah.
Ki pulit ki dang wad bniah la katei ka samla 29 snem ka don jingiadei eiei ne em bad utei u briew khnang ba ka jingtohkit kan lah ban iaid shakhmat da kaba shai.
