Shillong, Naitung 27:
Ka kynhun ki rangïalehkai phutbol ka ri ka la shah pynngat hapoh ka Group-A kaba kynthup lang ïa ka China, Bangladesh bad ka Myanmar na ka bynta ka Hangzhou Asian Games, hadien ba la dep ban pynïakap ïa ki kynhun ha ka sngi Palei.
Katba ka kynhun ki ‘thei ïalehkai ka ri ka la don ha ka Group-B ha kaba kan hap ban ïakhun pyrshah ïa ka Thailand bad ka Chinese Taipei.
Kine ki ar tylli ki kynhun ïalehkai ki la ïoh ïa ka lad ban leit ïashim bynta hadien ba ki la ïoh jingbit na ka tnat ïalehkai jong ka Sorkar Pdeng da kaba pynjynsur ïa ki kyndon kiba ka la buh.
Ha ka jingïakhun jong ki shynrang, kin don haduh hynriew tylli ki group bad ar tylli ki kynhun ki ban wan ha ki kyrdan ba hakhlieh na kawei pat kawei ka group lem bad saw tylli kiwei pat ki kynhun, kin ïoh rung sha ka pre-quarter final.
Na ka bynta ka jingïakhun ki kynthei, ki kynhun ki ban wan ha ki kyrdan ba hakhlieh na kawei pa kawei ka group bad ki lai tylli ki kynhun kiba wan ba-ar kin jam sha ka quarter final.
Kumba ka paw ka kynhun ki rangïalehkai ka ri ka la lah ban pynpaw ïa ka jingtbit ha ka Asian Games, ha kaba ka la khur ïa ka takma ksiar ha u 1951 bad ka la bteng biang ha u 1962.
Dangshen na ka liang ka Indian Olympic Association (IOA) ka la kyntait ban ai jingbit ïa ki kynhun ïalehkai ka ri na ka bynta katei ka lympung namar kim shym la don hapoh ka thup kaba phra ha Asia.
Te kumta na ka liang ka All India Football Federation (AIFF) ka la buh ka jingkyrpad na ka tnat ïalehkai ba kan ailad ïa kine ki ar tylli ki kynhun ba kin ïashim bynta ha katei ka lympung. Na ka liang u coach u Igor Stimac ruh u la buh ka jingkyrpad hakhmat u Myntri Rangbahduh ka ri u Narendra Modi ba un tuklar lem halor kane ka bynta.
Naduh u 2002, ïa ka jingïalehkai phutbol ha ka Asian Games la shah ba kin ïalehkai tang da ki nongïalehkai kiba hapoh 23 snem lem bad lai ngut kiba la kham heh snem.
Hynrei ha kane ka lympung mynta u snem la shah ïa ki rangïalehkai kiba 24 snem ba kin ïalehkai na ka daw ka jingpynsangeh shisien ïa katei ka lympung na ka daw ka jingwan lynshop ka khlap COVID ha China ha u snem ba la lah.
U kapten ka kynhun u Sunil Chhetri, ryngkat u rangapkol u Gurpreet Singh Sandhu lem bad u rangïalehkai ‘dien u Sandesh Jhingan kin long ki lai ngut ki rangïalehkai kiba la palat snem ki ban ïadon bynta bad kane ka kynhun.
Ki kynhun kiba don ha ki kyrdan ba kham shadien kata ka
Myanmar bad ka Bangladesh kiba la don ha kajuh ka group, ka India ka la khmih lynti ban ïalehkai bha khnang ba kan jam sha kawei pat ka wat jingïakhun, katba ka kynhun ki ‘thei ïalehkai ka ri kan ïaleh katba lah ban jam sha kawei pat ka wat.
Ïa kane ka lympung ïalehkai jong ka Asian Games yn pynlong ha u Nailur-Risaw, hynrei ka jingïalehkai phutbol kan sdang naduh 19 tarik u Nailur bad ïa ka final yn pynlong ha ka 8 tarik u Risaw.
