Jowai, Naitung 28:
Ka lympung ïalehkai Third Division Football Tournament na ka bynta ka 3rd Adelbert Laloo Memorial Trophy ba la pynïaid da ka West Jaiñtia District Sports Association (WJDSA) ka la nang jam shaphrang ha kaba ka Tympang Club bad ka Newhill ki la khur ïa ka jingjop ha ka sngi Thohdieng ha madan Kiang Nangbah Stadium ha Ladthadlaboh, Jowai.
Ha ka jingïakhun kaba nyngkong, ka Tympang Club ka la pynliem noh ïa ka Pasyih Cultural da 2-1 kol. Ha kane ka jingïalehkai la ong ba tang mar ïasdang ka jingïakhun, ka Tympang Club ka la ïoh ban pynkhih jar nyngkong eh lyngba u Pynshai Chyrmang ha ka minit kaba 8, hynrei u Ïaineh Suchiang u la lah ban pynïakhaid kylla na ka bynta ka Pasyih Cultural ha ka minit kaba 20. Hynrei ka Tympang Club ka la ïoh ban thep biang sa shi kol lyngba u Vishal Nongpluh ha ka minit kaba 55 na ka bynta ban khur syndon ïa ka jingjop.
Haba phai sha ka jingïakhun kaba bud, ka Newhill ka la jop da 2-0 kol ïa ka Chyrmang Wah. Ïa kine kol la thep da u Samson Swer ha ka minit kaba 4 bad u Dawanlang Laloo ha ka minit kaba 36.
