Ka pisa ka pynpisa lane ka pynlynga na ka daw ba lada don duna palat ruh ka jynjar bad lada la bun than ruh ka pynkha ïa ki jingkhuslai. Ym don jingsuk hangno-hangno. Sa kawei pat ka long ba ka pisa ka dei ka tynrai jong ki jingsniew baroh. Ngi ïohi ba katba nang ïaid ki sngi, ka jingïoh rung u drok bad kiwei pat ki dawai pynbuaid ka la nang kiew ha Meghalaya. Ki pulit ki ïaleh ban kem ïa ki nongkhaïi, bad ïa kita la ju pynpaw lyngba ki lad pathai khubor, hynrei ngi dei ruh ban pyrkhat pat ïa kito kiba ki pulit kim pat lah ban kem na ki daw bapher-bapher. Ha kane ka juk stad, kam dei kaba suk ban buddien ïa ki nongkhaïi drok. Ki bun buit shaba palat. Nalorkata, ki lynti rung bad mih sha Meghalaya ki bun bad ki pulit kin ym lah ban ap ha manla kawei-pa-kawei ka lad. Namarkata, lada ki khubor syntiat ki khlaiñ bad thikna, ki pulit ki ïoh ban kem ïa kita ki nongkhaïi da kaba suk, bad lada ym ïoh jingtip eiei, ki nongkhaïi ki ïoh ïaid da kaba suk sha kano-kano ka jaka kaba ki sngewmon ban leit. Ka jinglum jingtip da ki tnat syntiat ka dei kawei na ki bakongsan tam ban ïakhun ïa kine ki nongkhaïi drok kiba dei shisha kita ki nongpynjot ïa ka jaitbynriew bad ka Ri.
U heh duh ki pulit ka jylla lane u Director-General of Police (DGP), u LR Bishnoi, u la ïathuh ba ka pisa ka dei kawei na ki daw ba u drok u ïoh ban rung suk namar kiba bun ki ngop na ka pisa. U la ong ruh ba ka jylla Meghalaya ka la ïaid sted shakhmat ban long ka jaka pdeng jong ka jingkhaïi ïa u drok ym shuh tang ka lynti ban ïaid lyngba kaba la wanrah ruh ïa ka jingngop jong kiba bun ki khynnah samla, bad kumba long mynta, ka jinglong jingman hapoh ka jylla ka long kaba sniew bha. Hangne ngi sngewthuh ba ka pisa ka dei kawei na kiba ai mynsiem ïa ki briew ba kin ïadonkti ha ka kam khaïi drok bad ban pynngop ïa ki briew kiba lui-lui ha une u jingdih. Shisien ba la ngop, ka la eh ban lait na ka jingkyrni. La shna ïa u drok ha kata ka rukom ba ki nongpyndonkam kin ym lah shah lada kim ïoh ïa une u jingdih.
Mano ki bym donkam ïa ka pisa? Baroh ki donkam katba dang ïa im ha kane ka pyrthei kaba dei tang ka ïing shong basa. Ka jingkhaïi drok ka ju wanrah da ki phew klur tyngka. Kiba tlot ha ka jingmut jingpyrkhat, ki lalot spah, ki khwan myntoi kin ym lah shah ban ym kner ïa la ki kti ban die drok namar ka jingïohnong ka bun palat. Ki thom beit ïa ka sang ka ma tang ban ïoh ïa kata ka spah. Lada ngi peit kai na ki phlim shaphang ka jingim jong ki nongkhaïi drok kiba shyrkhei ka pyrthei, ngin shem ba ka spah ka phew jong ki ka long kaba la itriem. Tang ki ïing ki sem, jaka, kali bad kumta ter-ter kiba ki don ki la kot sha ki phew klur tyngka. Ha kiba tlot bad kiba lalot ha ka jingmut jingpyrkhat, mano keiñ ban lah shah haba ïohi ïa ka tyngka? Kane ka dei ka jingduna ha ka longbriew ka manbriew bad ka jingrhah ban kiew spah la kumba ynda la ïap, lah ban kit lang ïa kata ka spah bym hok. Tangba haba pynngop ïa ki lui-lui ha ki kam jakhlia kum u drok, ka sngi kan sa poi ba kan kyrtoh kylla ïa kito kiba pynngop. Ngim dei ban ïa kmen toh hoh ha ka pisa bym hok namar kan ym shongneh bad kan wanrah kylla ïa ka jingbabe.
U Bishnoi u la ïathuh ba ha kane ka shi snem, ki pulit ki la pynrung palat 130 tylli ki ‘case’ ha kaba ïadei bad ka jingïoh kem ïa ki nongkhaïi drok. U la pyntip ruh ba tang ha kine ki shisnem, ki pulit ki la ïoh ban kurup haduh 14 kilo u drok ‘Heroin’, 400 tylli ki mobile phone, 200 tylli ki kali, 12 hajar kilo u ganja bad haduh 400 tam kiba la shah kem. Napdeng kine ki 400 ngut, ki don kiba dang shong ha patok, don kiba la lait jamin bad don ruh kiba la lait syndon bad kiba pyrshang ban sdang die biang ïa u drok. Kam don satia ka jingthngad ha ki namar ki la dep mad ïa ka jingïohnong kaba bun na ka jingkhaïi drok. Kan eh bha ïa kine ki jait briew ba kin babe namar ki peit beit shwa ïa ka pisa bad ka jingmyntoi shimet khlem da don kano-kano ka jingsngew ïa kito ki lui-lui kiba ki la pynngop.
Na kine ki jingkheiñ ba la ai da u DGP ki kdew shai ba u drok u la treikam bha ha Meghalaya. Ka suk bha bad kam shimpor ban pynsniew, hynrei kan bam por da ki phew snem ban pynduh jait ïa u drok. Ngin hap ban shu ïa long husiar ha ka ïaid ka ïeng bad ha ka jingjied ïa ki paralok. Lada bakla ha ka jingjied paralok, ngi lah ban poi sha ka apot jong ka jingshah pynngop ha u drok bad kan eh palat ban wanphai biang na kata. Pynkhlaiñ ïa ka jingmut jingpyrkhat khnang ba phin lah ban ong beit ‘EM’ ïa u drok ne kiwei pat ki jingduh pynbuaid. Bad ha kajuh ka por, wat ïa rhah ïa ka spah bym hok namar kan sa kyrtoh kylla.
