Bertina Lyngdoh
Na pajih ka sor ki im, ki im ha pyntha kba, ki bam ka ja-sohriew, ja-tungtyrkhong. Ki don bun ki khun ki kti, ki pyrsa ki ksiew, ki miaw ba shngaiñ ka ïing bad syaid ka dpei. Ki im shida, ki tieng burom bad ba ki tip I’u Blei. Ki trei khlem thait, ki trei ban im ki trei ban bam. Ki da tip ïa ka kheiñkur kheiñkha, ka burom ha bad habar ïing, ki sngewthuh ïa ka pang ka shitom, ka koit ka khiah, bad ki jingdon jingem. Ki khuid ha ka ktien ka thylliej, ka pyrkhat pyrdaiñ, bad ka rai ba ki shim. Ki ïa muja ha ki lum ki wah, ki bri ki lyng-kha, ki khlaw ki btap bad kiwei de ki jingim ka mariang. Ki ia shynrain ïa ki kam thala kam sniew ka pyrthei ba ïar. Kine keiñ ki dei ïa kiba ngi ju ong “Ki mynsiem sngur ki nongkyndong.”
Kine baroh ki jinglong jingkren ki thew ïa kito kiba na sha kyndong bah kyndong san ki shnong ki thaw. Haba ha lynti ki ïaid ki ieng, na la shnong sha sor ki ïaid shida, shaba ki dei ban ïaid bad poi. Haba sha ki jingsumar ki leit, ki da dwai da phirat ba u blei te un don ryngkat bad ki. Ha ka jingleit jingwan jong ki, haba ki ïakynduh bad kiba pang ba shitom, ne kiba don jingduna ha ki dkhotmet, ym tang da ka khmat isynei ba ki peit, hynrei ka mynsiem bad ka jingai jingïarap jong ki ka kren bad pyni shisha ïa ka jingtip jong ki I’u Blei bad ba ki leh ïa kine ki kam na ka bynta ka burom u Blei. Ki long ruh kita kiba sngewthuh bad babe ïa la ki jingbakla khamtam ha ka jingbym lah jong ki ban bahryndang la ki khun ki kti. Ka kmie ka jingieit, u kpa ka jing-suk, ngi dang lah ban lap sa tang ha kum kine ki mynsiem briew. Ki dang long ruh kita kiba trei pyndep ban dap ban biang lang shi-ïing shisem. Ki lah ban long kita kiba duna ha ka pule puthi ne ka jingnang jingstad ne wat ha ka spah ruh, hynrei ka mynsiem sngur jong ki ka pyni ba ki ïar ha ka jingnang jingstad. Ki khmat ba iohi jong ki, ki ktah bad ktik ïa ka mynsiem jong ki ym kum kito kiba shu isynei khlem ka mynsiem pat. Haba kum kine ki mynsiem briew ki poi sha sor, ki nongsor ki la dei ban ïoh bha ïa ka jinghikai na kine ki nuksa na ki. Haba ki wan sha sor ba jingdonkam jong ki, ki rung ki mih kat haba shah kloi ki jaka bam tang ban lait ka thngan bad kdang ka kpoh. Ki da beh pynsted ruh sha la ïing ba ki tip te ba pyrthei ka sniew. Kim don ka lorni ka lorhap ïano ïano ruh. Ha ki, lah ban ïohi ba ki dei kita kiba tieng burom I’u Blei bad ba ki tip ba kim im sah ha kane ka pyrthei. Ei te ba lah ban im kum kine, dei tang kito ki khun thaw tipsngi i mei i pa ha kaba ka jingkmen jong ki kam ju tylli.
Namarkata, kine dei kita ki mynsiem sngur baieit ki Blei. Niar ban shem kum kine khamtam ha ki sngi ki por mynta. Ynda haba ïakynduh pat bad ki, sngew shisha ba ki briew Blei ki dang don ha kane ka pyrthei ba ïar. Ki sngi khatduh ki la nang jan, ki briew pat ki im thik la kumba ka jingïap kan ym lap shuh ïa ki. Katba haba peit pat ïa ki mynsiem sngur ki nongkyndong ka paw shai ba ki tieng that-that ïoh ba ka jingïap ka lap ïa ki. Te kumta, ki im ka jingim kaba u blei u kwah ïa ki ban im. To ngin im bad long lem kum ma ki ïa kat-lah kat-ïai ba mynsiem te kan suk ha ki khyllipmat ba khatduh.
