C. B. Iawphniaw
Ki tymmen mynshuwa ki im da ka rep ka riang ryng-kat ki ieit ia ka mariang. Ki ri ki sumar kyrpang ïa ki ‘lawadong, ki thung dieng thung siej hapoh shnong hapoh thaw. Ki thung ym tang ïa ki dieng ki siej hynrei ki thung ïa ki maw, kum ki mawbynna shynrang bad ki mawbynna kynthei. Kine ki mawbynna ki don ha kylleng ka Bri u Hynñiewtrep. Nangta ki pun jingkieng ïa ki wah barit da ki maw lynter ba jrong ban ioh ïaid na shiliang sha shiliang ka wah. Haba phi leit poi sha ki wah phin lap ïa kiba kum kine ki rukom pun lynti da ki maw ban shaka na shiliang sha shiliang jong ka wah.
Ha ki wah bah kiba heh pat ki pun da ki pyrman da ki dieng ki siej ban ioh ïaid na shiliang sha shiliang jong ka wah. Ki im da ka rep ka riang hynrei kim ju pom pathar ïa ki dieng ki siej lait noh ïa kito ki jaka ba ki syrti lyngkha. Ki tymmen mynshuwa ki tip kumno ban ri ban sumar ïa ki khlaw ki btap. Ki pom ïa ki dieng ki siej kiba la bteng ban ioh shna ïa ki ïing ki sem. Kim ju pom pathar kum mynta ban thang rnga naphang ïa ki dieng ki siej kiba dang rit haduh kiba rit haduh kiba heh tang ban ioh kamai pisa lyngba ki dieng ki siej. Kane ka rukom leh kane ka juk ba mynta ka long kumba thang pynduh jait ïa ki dieng ki siej kiba ka mariang ka la ai ïa ngi. Ki tymmen mynshuwa ki ju shna ïing shna sem da ki maw khamtam ha kito ki jaka ba jur bha u slap bad ka lyer.
Hynrei kiba bun ki shna ia ki iing ki sem ki shna da ki dieng ki siej, ki phlang kum u traw, u tynriew bad kiwei kiwei. Ha ki por mynshuwa ym ju don ba shna ïing shna sem da ka dewbilat, ki tin bad ki nar rot. Baroh ki ïing ki sem ki shna da u traw bad u tynriew bad ki kynja dieng ba bun jait.
Don lei lei ki jaka ba ki tymmen mynshuwa ki thung ïa ki diengjri harud ki wah ban pynlong kum ka jingkieng ban ïaid na shiliang sha shiliang ka wah. Ki jingkieng diengjri mynta ki long ka sakhi ïa ka jingstad ki tymmen mynshuwa ban sumar bad ban ri ïa ka mariang. Kine ki long tang khyndiat eh ka jingïeit mariang ki tymmen mynshuwa.
