Shillong, Naitung 28:
U rangïalehkai shapdeng barim ka Manchester United u Shinji Kagawa u la lah ban pynurlong ïa ka kynhun ïalehkai J-League, ka Cerezo Osaka ban pynliem noh ïa ka Paris Saint-Germain da 3-2 kol ha ka jingïalehkai paralok kaba la long ha Osaka.
Watla u Hugo Ekitike bad u Vitinha ki la lah ban thep kol na ka bynta ka PSG, hynrei ka Cerezo Osaka ka la lah ban beh kylla na ka bynta ban pynphai kylla lyngba u Jordy Croux bad u Sota Kitano. Ïa ka rai kaba khatduh la lah ban pynurlong da u Kagawa, uba la lah ban pynurlong ïa ka Cerezo ban khur syndon ïa ka jingjop pyrshah ïa katei ka kynhun kaba khlaiñ bor na France.
Ha kane ka jingïakhun kaba ar, u Neymar um shym la lah ban ïasoh lang bad katei ka kynhun naduh ba um shym la lah ban ïadon bynta lang ha ka jingïalehkai ba ka la ïakhaid khlem ba thep kol pyrshah ïa ka Al Nassr, kaba don ïa u Cristiano Ronaldo, ha ka sngi Ba-ar.
Ha kane ka jingleit ïalehkai ka PSG sha Asia, u Kylian Mbappe um shym la poi pyrkhat ban shah weng na ka kynhun ïalehkai. Ki khubor ki la ïathuh ba katei ka klob ka la ïoh ka jingshah tyrwa ha ka jingsiew kaba heh tam ha ka pyrthei, kata 300 million euros ($333 million) na ka kynhun ïalehkai kaba na Saudi Arabia ka Al Hilal na ka bynta utei u khlur ïalehkai na France.
Haba phai sha katei ka jingïakhun, u Ekitike u la pynkhih jar nyngkong eh na ka bynta ka PSG ha ka minit kaba 17, hadien ka jingïarap pynbuh bol da u Warren Zaire-Emery. Ka jingïalehkai lang u Milan Skriniar bad u Danilo Pereira ka la pynlong ïa ka Cerezo ban pynphai kylla hadien san minit lyngba u Croux na ka bynta ban ïakhaid mar shi kol ha ka kylla step.
Hadien saw minit ba la bteng biang ïa ka jingïakhun jong ka kylla miet, ka PSG ka la thep ïa ka kol kaba ar lyngba u Vitinha. Hynrei ha ka minit kaba 67 ka Cerezo ka la lah ban pynïakhaid kylla lyngba u Sota Kitano ha kaba u rangapkol ka PSG u Gianluigi Donnarumma um shym la lah ban pyllait na ka jingshah thep.
Hadien katto katne por u Kagawa u la lah ban pynurlong na ka bynta ka Cerezo ha ka minit kaba 79 hapoh ‘box’.
Ka PSG kan pynkhreh biang ïa ka jingïakhun ka ban wan pyrshah ïa ka kynhun kaba wan ba-ar ha ka Champions League ka Inter Milan ha ka sngi Ba-ar ha Tokyo, hashwa ba kan leit sha South Korea na ka bynta ban ïakhun pyrshah ïa ka kynhun ïalehkai jong ka K-League ka Jeonbuk Hyundai Motors.
