Shillong, Naitung 28:
Ka Mawlai SC kaba dei ka lahduh jong u snem ba la dep kan pynkhreh ban ïakhun pyrshah ïa ka Laitkor SC ha ka final jong ka Women’s League 2023 ba la pynïaid da ka Shillong Sports Association ha ka sngi Saitjaiñ ha SSA Stadium, Polo.
Kane ka jingïakhun final kan sdang ha ka 3:30 janmiet bad ïa ki tiket na ka bynta ki paidbah nongpeitkai lah ban ïoh na katei ka jaka.
Ka jingïoh rung biang kine ki kynhun ka long ka jingïai bteng na u snem ba la dep, ha kaba ka Mawlai ka la jop da 2-1 kol ha ka jingai por tam (extra time) na ka bynta ban khur ïa ka nam lahduh.
Kumba ka paw lyngba kane ka lympung ïalehkai ha ka sien kaba ar la ïohi ïa ka jingkiew ki kynhun ha ka rukom ïalehkai naduh ka jingpynshat bol, rah bol bad shut bol. Ha kaba kut dei tang ka Laitkor bad ka Mawlai ki ban ïaknieh biang ïa ka nam lahduh.
Kumba ka paw ka Mawlai ka la hap ban ïakhun tyngeh ha ka jingïalehkai jong ka Group-B, hynrei ha kaba kut ka la lah ban tam ïa ka Lumparing lyngba ka ‘goal difference’ na ka bynta ban bat ïa ka kyrdan ba hakhlieh. Ha ka jingïakhun semi final ka la lah ban pynliem ïa ka PFR Academy lyngba ka tie-breaker hadien ba ki la ïakhaid mar 1-1 kol.
Haba phai sha ka Laitkor ka la long tang ma ka, ka kynhun kaba la khur jingjop haduh san sien ïakhun ha ka Group-A bad ka la tam haduh ar point ïa ka PFR, kaba la hiar sha ka kyrdan ba-ar. Hynrei ha ka jingïakhun semi final ka Laitkor ka la lah ban pynliem noh ïa ka Lumparing da 4-1 kol na ka bynta ban ban sha ka final jong kane ka lympung.
Watla kane ka kynhun ka la lah ban pynpaw ïa ka jingtbit, hynrei mynta ka kynti kan hap ban mih madan khlem ka Ïaraplang Nongrum, kaba la khur ïa ka hat-trick ha ka jingïakhun semi final bad kaba long ruh ka snar nongthep kol ha manla ki jingïakhun jong ka Group-A. Ka jingbym lah ban ïadon bynta lang jong ka ha kane ka jingïakhun ka long namar ba ka la shah jied ban shah pyntbit hapoh ka shlem ai jinghikai jong ka Bhaichung Bhutia Football Schools kaba ha Nashik, Maharashtra.
Wat la katta ka Laitkor ka dang don ïa ki ‘thei ïalehkai kiba kynsai ki ban ïapyni bor bad ki ‘thei ïalehkai ka Mawlai ha kaba la khmih lynti ba kan long ka jingïakhun ka ban pynhun ïa ki paidbah nongpeitkai.
