Shillong, Naitung 28:
Ki ar ngut shipara na ka shnong Nongtalang Mission, kaba hap ha Amlarem constituency, West Jaiñtia Hills District ki la paw pyrthei ha ka rukom rwai naduh ba wan ka jingkhangdam ïa ka pyrthei baroh kawei na ka jingwan ka khlam COVID-19.
Kine ar ngut shipara ki dei ba la tip kyrteng kum ka Mardikithei Rymbui kaba dei ka para bad ka Hun-I-Kai Rymbui kaba dei ka hynmen. Ka sap jong kine ar ngut shipara ka la paw pyrthei hadien ba ïoh ban shimbynta ha ka Singing Audition ba la pynlong da ka phlim ‘Dhaka Escape’ ban thep ha Chwa Syiemlieh Production channel kum shi bynta ban jied nongrwai ban rwai ha kane ka phlim (Dhaka Escape) kaba dei ha u snem 2020 katba ka dang pyrkhing bha ka jingkhangdam ha ka pyrthei baroh kawei namar ka jingwan ka khlam COVID-19.
Haba kine baroh shipara ki la pynpaw ïa ka sap rwai ha Youtube, ka Chwa Syiemlieh Film Production ka la jied ban rwai nyngkong ha ka music video ‘Nga La Ïoh Mad’ na ka phlim ‘Jingim’ kaba la dep pyllait ha u Nohprah 2021. Hadien kata ka Mardikithei Rymbui ka la shah jied ban rwai sa ha ka music video ‘Shiteng Lynti’ na ka phlim ‘Khohwah Nongsor’ ban rwai lang bad u Ram Suchiang kaba la poi palat shi million view hapoh shibnai ha Youtube channel.
Katba ka Hun-I-Kai Rymbui ka la ïoh ban rwai ha ka jingrwai ‘Jelebi’ jong ka phlim ‘Brother of Skop’ kaba la kot palat 2 million views ha kine ki ar snem hadien ba la thep ha Youtube channel.
Kine ar ngut shipara ki la ïoh ban wan sakhi da la ki jong ki khmat ïa ka phlim ‘Khohwah Nongsor’ haba la sdang ban pyni ha Panaliar Jowai ban sngap ïa ka jingrwai ‘Shiteng Lynti’ kaba ki paidbah ki la tem ha man ki thliew iing.
Haba ïakren bad ka Mardikithei ka la pynpaw ka jingsngewkmen haba ka jingrwai ‘Shiteng Lynti’ kaba la rwai bad u Ram Suchiang ka la poi shi million view hapoh shibnai bad ka kyrmen ba kan dang ïai rwai shuh shuh katba dang mih ki sngi.
Ka la ïathuh ba mynta ka dang pule ha shnong ha Nongtalang bad kan dang bteng ban rwai lada don kiba dang khot ïa ka.
Katba ka Hun-I-Kai kaba dang pule kumjuh ha shnong Nongtalang, ka la ïathuh ba ka la nang ban rwai ka dei namar ka sdang ban rwai ha ïingmane bad ha ki jaka ba don jingïathoh bad rynsan tem ka put.
Ka la ïathuh ba ka jingïoh ban rwai lang ha ka phlim Jingim ka dei namar ki la ioh ban ïarwai lang ruh ha ka Jaiñtia Got Talent, hynrei ki khlem poi sha ka thong namar ki wan ba ar.
