Florida, Naitung:
Kawei ka khynnah 11 snem na ka nongbah Florida jong ka United States, ka la shah kem noh ha ka Sngi Balang hadien ka jingleh be-aiñ da kaba phah khubor (message) bad pyntip sha ki pulit ha u nombar ‘911’ bad thok ba ka paralok jong ka, ka la shah rahbor ha katei ka sngi.
Ki pulit ki iathuh ba katei ka khynnah ka la phah ia katei ka message sha utei u nombar bad hadien kata ki pulit ki la leit her khlem da pynslem shuh khnang ban ioh bat ia kitei ki runar kumba la iathuh da katei ka khynnah. Hynrei ynda la wad bniah bha, katei ka khynnah ka la shu thok bad pyndonkam kai ia utei u nombar ba la buh tang ban pyni sha ka pyrthei lyngba ka jingioh mynsiem jongka na Youtube ban leh myn leh ‘Prank’ bad kumta ka la thok ia ki pulit da kaba shu thaw ktien.
Ha katei ka message ba la ioh pdiang da ki pulit, katei ka khynnah ka iathuh ba ka paralok ba 14 snem jong ka, ka la shah rahbor ha uwei u runar uba don ia ka suloi bad la kit ia ka ha kawei ka kali ‘Van’ rong lieh kaba iaid sha ka phang South I-95 jong ka Oak Hill.
Kumta, ki pulit ki la leit her mar-mar ban bud dien bad beh kthong ia kata ka kali van rong lieh kumba la batai da katei ka khynnah hynrei ka long kaba sngew lyngngoh ba kim shym lap eiei dei tad haduh ba kin da bud dien ia ka jaka ba katei ka khynnah ka don bad la shem pynban ba dei tang ka jinglehkai jongka ban pyni sha ka pyrthei ia ka jingstad bad jingshlur jongka ban leh ia katei ka kam shukor.
