Shillong, Naitung 28:
Ka Assam Rifle Public School (ARPS) na East Khasi Hills, Saiden Secondary School na Ri-Bhoi District bad ka H.K. Sing Secondary School na West Jaiñtia Hills ki la khur ïa ka nam lahduh ha ka State Level Inter School Subroto Mukherjee Cup Football Tournament 2023.
Kine ki kynhyun kin mihkhmat ïa ka Jylla sha ka International Subroto Mukherjee Cup 2023 ka ban sa long shen ha ka nongbah Delhi.
Ha ka jingïakhun final jong ka Under-17 ki shynrang kaba la long ha ka sngi Thohdieng ha SAI Training Centre, ka Assam Rifle ka la lah ban pynliem noh ïa ka Rymbai Presbyterian HSS na East Jaiñtia Hills lyngba ka tie-breaker da 5-4 kol.
Haduh kaba kut ka jingïalehkai kine ki kynhun ki la ïathep mar 1-1 kol. Na ka liang ka Assam Rifle la thep da u Phermanbha Lyngdoh ha ka minit kaba 19 bad ïa kawei pat u la thep lyngba ka penalty ha ka minit ba 38, katba na ka Rymbai Presbyterian la thep da u Besterly Ksih (21) bad u Sokiwa-oo Bareh (60+2).
Hashwa ban sdang ka jingïakhun final jong kane ka kyrdan ïalehkai la ïadon lang u Myntri ka tnat ïalehkai jong ka Sorkar Jylla u Bah Shakliar Warjri kum u kongsan. Une u Myntri u la pynshlur bad ai mynsiem ïa ki khynnah ba kin ïalehkai bha ha ryngkat ka jingtrei shitom khnang ba kin ïoh kheit ïa u soh ka jingjop.
Ha ka Under-17 jong ki kynthei, ka Saiden Secondary School ka la pynliem noh ïa ka Ïewrynghep Secondary School na East Khasi Hills lyngba ka tie-breaker da 4-2 kol hadien ba kim shym la lah ban thep kol haduh kaba kut ka jingïalehkai.
Haba phai sha ka kyrdan ïalehkai Under-14 ki shynrang, ka H.K. Sing Secondary School ka la lah ban pynliem noh ïa ka K.B. Memorial Secondary School na East Jaiñtia Hills lyngba ka tie-breaker da 4-1 kol hadien ba kim shym lah ban thep kol haduh kaba kut ka jingïalehkai.
Ïa ka nam Best Goal Keeper ha ka Under-14 la ïoh da u Novem. F. Siangshai na ka K.B. Memorial Secondary School bad ïa ka nam Players of the Tournament ka leit sha u Budmiha O. Mukhim na ka H.K. Singh Secondary School. Ïa ka nam Best Goal Keeper ha ka Under-17 jong ki kynthei la khur da ka Yulity T. Phangrang na ka Ïewrynghep Secondary School bad Players of the Tournament ka leit sha ka Diamon Makhroh na ka Saiden Secondary School. Ha ka liang ki shynrang ïa ka nam Best Goal Keeper la ïoh da u Oinam Abin Singh na ka Assam Rifle Public School bad Players of the Tournament ka leit sha u Bankerbha Dkhar na ka Rymbai Presbyterian.
Ïa ki khusnam sha ki nongjop la sam da ka Director ka tnat ïalehkai ka Kong Isawanda Laloo, kumjuh u Working President ka MSOA u Bah John F. Kharshiing, u Deputy Director ka tnat ïalehkai u Bah PB War Nongbri, Assistant Director u Bah K. Passah, ha ryngkat ka jingïadon lang ki District Sports Officer bad kiwei.
