UK, Naitung:
Uwei rangbah uba la shah set patok la kumba 17 snem, ha ka Sngi Balang pat la ong ba ka ïingbishar ka la pyntikna bad pynpaw pyrthei ba um shym don bynta eiei ha ka kam batbor ba la pharep ia u da baroh shi katta. Kumta ruh ka ïingbishar ka la rai ban pyllait noh ia u naduh katei ka sngi.
Hadien ba la dep ban wad bniah bha ia ka snam jong utei u briew lyngba jong ka ‘DNA Test’ la shem ba utei u briew ia uba la ithuh kyrteng u Andrew Malkinson, um shym dei kumba la pharep bad pynngat ia u ha katei ka kam batbor.
Katkum ki tyllong khubor ba la iathuh, la ong ba u Malkinson u la shah kem naduh u snem 2004 halor ka jingshah pharep ba u leit thombor ia kawei ka kynthei ha Salford, bad naduh utei u snem ba la kem ia u, u la shah pynngat bad shah pynshong patok da ki phew snem hynrei dei tad haduh u Kyllalyngkot jong une u snem ba la aiti ia katei ka mat sha kawei pat ka ïingbishar, ha kaba la lap da kiwei pat ki sabut ba utei u rangbah um shym la leh ia katei ka kam kumba la kynnoh bad pharep baroh shi katta ki snem.
Utei u rangbah uba la don 57 snem ha kane ka por ba la pyllait noh ia u, u la pynpaw ka ia jingkmen kaba khraw mynta ba u la lait mih na patok hynrei ha kajuh ka por ruh u la pynpaw ka jingsngewsih kaba jur ba haduh kumba 20 snem duna u la shu shah set patok ei na ka bynta ka pop bad ka kam runar kaba um shym la don kti ne don bynta eiei.
Na ka liang ki pulit ruh ki la pynpaw ka jingsngew ba-be halor ka jingpharep ia u Malkinson baroh shi katta ki phew snem ba la leit bad kumta ruh ki la pan map bad kular ban ym pynthud shuh ia u nangne sha khmat.
Hynrei kaba sngewsih ia utei u briew ha kane ka kynti, u la ong ba, ka long namar ba um don jaka shuh ban leit phai, um don shuh ka kam- ka jam, um don shuh ka iing- ka sem bad ka ïingbishar ka shu pyllait ia u khlem kano- kano ka dak jingsngewlem bad khlem da pan-map bad khlem ai jingkyrshan ruh ia u ba kumno nangne sha khmat un bteng biang ia ka jingim jong u kum u riew paidbah.
