Brisbane, Naitung:
Katkum ki khubor la ong ba ka Australia ha ka Sngi Saitjaiñ, ka la pynsangeh noh shwa ia ka jingpynkilan ia ki shipai liengsuiñ ka Australia bad ka United States hadien ba kawei ka liengsuiñ ‘Helicopter’ kaba iadon bynta ha katei ka jing pyn kilan ka la leit hap ha ki bynta jong ka Pacific bad 4 ngut ki dkhot ka tnat shipai ki la jah rngai ha katei ka jingjia.
U Myntri ka tnat iada jong ka Australia, u Richard Marles, u la ong ba katei ka liengsuiñ MRH-90 Taipan ka la leit hap bakla ha ka miet jong ka Sngi Thohdieng ha ki bynta jong ka duriaw Pacific hajan ka Hamilton Island jong ka Queensland.
Kitei ki shipai kiba don ha katei ka liengsuiñ ki dei kiba ïashim bynta ha ka jing pyntbit bad jing kilan jong ki 30,000 ngut ki shipai ka Australia bad United States bad kumjuh ruh ki shipai na kiwei de ki ri.
