C. B. Iawphniaw
Ka Khyndew bad ka Meimariang ka long ka nongpyndap bam ïa ngi ki briew. Ka khyndew ka long kum ka Kmie kaba ai buiñ ai thiang ïa ki khun ba kin heh kin san. Khlem ka khyndew ngim lah ban im ha kane ka sla pyrthei. Ka khyndew kaba pynmih bun kiei kiei kum ki soh ki pai, ki jhur ki jhep, ki jait phan ba lai phew jait. Ka pynmih ruh ia u kba, u krai, u kew, u barli, ka kait ka shriew, etc. Ka khyndew ka pynmih ki jait dieng ba lai phew jait kaba ai jingmyntoi ïa ngi ki briew ban ioh shna iing shna sem.
Ka khyndew ka pynmih ki jait dawai kynbat ban ïada na ka pang ka shitom ïa ngi ki briew. Ka khyndew bad ka Mei mariang ka long kum ka jaka rep ba kongsan tam kaba pynim ïa ngi ha baroh ki rta ka jingim jongngi ki briew. Baroh ki jait jingbam ba ngi ki briew ngi ioh bam ki mih na ka khyndew. Ka khyndew ka long ka nongbsa nongpjah ia ngi ki briew, bad ki mrad. Ka khyndew ka long ruh ka nongrim nongsumar ïa ngi ki briew.
Ka ai ïa u jing-thung uba ngi ki briew ngi ju rep ha ka khyndew. Ka khyndew ka pynioh spah pynioh kamai napoh ka Meimariang Ka khyndew ka pyndap bam pyndap sa ïa ngi ki briew ha satlak ka pyrthei. Lyngba ka khyndew ngi ioh bam. Ka khyndew ka pynmih ïa ki marpoh khyndew kum ka ksiar, ka rupa, u Dewiong, u Mawsiar, u Mawshun, u Mawleiñ, u Uranium, ka umphñiang Petrol, ki mawlynnai bapher bapher ngi ioh na ka khyndew.
Ka khyndew ka pyndap ïa kiei kiei ki jingdonkam jongngi ki briew. Khlem ka khyndew ngi lah ban ïap tyrsaw khlem ioh bam ei ei. Baroh ki jingthaw ba im ruh ki im ki ioh bam na ka khyndew bad ka Meimariang. Kane ka long ka jingkordor jong ka khyndew bad ka Meimariang.
