Shillong Naitung 30:
Ka Mawlai Sports Club ka la rah ïa ka nam lahduh jong ka Shillong Sports Association’s (SSA) Wo-men’s League 2023 hadien ba pynliem noh ïa ka Laitkor Sports Club da 3-1 kol ha ka final kaba la long ha ka sngi Saitjaiñ ha madan SSA Stadium, First Ground, Polo.
Lah ban pynkynmaw ba ka Mawlai ka la ïoh rah teng ïa ka nam lahduh jong kane ka lympung ha u snem ba la dep ruh da kaba pynliem hi ïa ka Laitkor ha ka final.
Haba phai sha ka jing-ïalehkai final, ka la long kaba itynnad bad ïakhaid bha ha kaba sdang bad dei ha ka minit kaba 15 ba ka Sunalinda Iawren ka la ïoh thep ïa ka kol ba nyngkong ka Mawlai, hynrei ha ka minit kaba 36 lyngba ka jingïakhun tyngeh, ka Laitkor ka la ïoh ban pynphai ïa kane ka shi kol ba la khyrwit da ka Iawanlang Nongbet.
Watla ka la lah ban pynïakhaid hynrei tang hadien 4 minit, kata ha ka minit kaba 40 ka Mawlai ka la lah ban pyntam biang lyngba ka kol ba la khyrwit da ka Charlinda Nongtdu bad ka Ideibanri Kharpan kala thep ïa ka kol kaba lai ha ka minit kaba 50 kaba la biang pura ïa ka Mawlai ban rah biang ïa ka nam lahduh jong katei ka lympung.
Watla ha kane ka jing-ïakhun la don kiba mad ïa ka jingjop bad jingrem hynrei kine ki ‘thei samla ki la lah ban pynpaw ïa ka rukom ïalehkai kaba itynnad kaba kdew bad pyni ruh ba ka jingïalehkai phutbol jong ki kynthei hapoh ka jylla mynta ka la sdang ban kiew.
Ha kane ka sngi, ka Director of Sports and Youth Affairs, ka Kong Isawanda Laloo ka la ïadon lang kum ka kong-san bad ban aiti ïa ka song pisa da ka cheque kaba T.30000 bad ka trophy sha ka Mawlai kaba la long ka lahduh, katba ka Laitkor SC kala ïoh pdiang ïa ka cheque kaba T.18000 ryngkat bad ka trophy.
Ha kane ka sngi la ïa-donlang ki nongkitkam ka SSA kiba kynthup ïa u Bah Karsing Kurbah, Bah Prosper Warjri bad Freddy Kharpran bad kiwei kiwei.
Ka Priyanka Latam jong ka Lumparing SC kala ïoh khur ïa ka khusnam Best Goalkeeper, ka Nisilia Majaw jong ka Laitkor SC kala ïoh ïa ka khusnam Player of the Tournament bad ka Suna-linda Iawren jong ka Maw lai SC kala ïoh ïa ka khusnam Player of the Final.
