Nongpoh, Naitung 30:
Ka Thad Football Club ka la ïoh rah ïa ka nam lahduh jong ka lympung ïalehkai phutbol kaba la pynlong da ka Umsning Sport & Cultural Club (USCC) hadien ba ka lah pynliem noh ïa ka Warrior Umran Diary da 1-0 kol ha ka final.
Haba phai sha ka jingïalehkai final kaba la wan ban sakhi da ki nongkyrshan na baroh arliang, la sakhi ba ka jingïakhun ka la long kaba ïakhaid bha hapdeng ki arliang mamla bad kaba itynnad. Hynrei ka shi kol ba la ïoh khyrwit ha kane ka jingïalehkai, ka la biang pura ïa ka Thad FC ban jop bad rah syndon ïa ka nam lahduh.
Ïa kane ka lympung ïalehkai la wan pynhap pyrda da u Bah Rayonald Kharkamni, President ka Ri Bhoi District Cricket Associa-tion kum u kongsan ha ka jingïadonlang u samla James H Mawphniang, General Secretary ka KSU, North Khasi Hills, kiwei kiwei ki riew pawkhmat nalor ki nongkitkam jong ka Umsning Sport & Cultural Club.
Haba ai jingkren ha kane ka sngi, u Bah Rayonald Kharkamni u la pynpaw ïa ka jingkmen ban ïa donlang ha kane ka sngi ba pynhap pyrda ïa ka lympung ïalehkai kaba la long kum ka rynsan ban ailad ïa ki samla donsap ban ïashimbynta ban sei ïa la ki sap ki phong ïalehkai phutbol kaba dei ruh ka kam ïalehkai kaba la pynim jakpoh ïa kiba bun ki ‘rang bad ki ‘thei ïalehkai phutbol jong ka jylla Meghalaya.
U Bah Kharkamni u la ai khublei kyrpang ruh ïa ki nongïalam ka Umsning Sport & Cultural Club kiba la ai ïa ka jingïatreilang ha kaban ai ïa ka jaka ban pynlong kum ka jaka pyntbit (net practise) ha ka kam ïalehkai kriket ka thaiñ Umsning kaban long shisha ka jingmyntoi na ka bynta kito ki samla kiba donsap ha ka jingïalehkai kriket bad kiba angnud ban kiew ha kane ka kam ïalehkai.
“Kum ki nongïalam jong ki Sport Association, ngi don shisha ïa ka jingkitkhlieh kumno ban kyntiew ïa kine ki kam ïalehkai bad ruh ban plie ïa ki lad ki lynti ban plie lad ruh ïa ki samla donsap ban ïoh ïa ka rynsan ban pyntbit bad ban kiew shuh shuh ïa la ka sap ka phong bad ruh ban long briew man briew lyngba kine ki kam ïalehkai”, ong u Bah Kharkamni.
