Ha kine ki khyndiat sngi, u Myntri Rangbah, Conrad K Sangma, u la ong ba ka jingthmu ka sorkar jylla ban kham pynduna ïa ka dheng kali ha Shillong lehse kan dang shim por, hynrei ki don pat katto katne ki projek kiba la nang pynwandur ban pyntreikam kiba kynthup ïa ka ‘Flyover’ bad ‘Skywalk’ nalor ki jaka ïeng kali bad jingtei ïa ka Secretariat thymmai ha New Shillong Township ki ban sa ïarap weng ïa ka jingeh namar ka jingkhapngiah bad ka dheng kali. Ngi kwah ban pyntip hangne ba kita ki jingphohsniew ban shna ïa ki ‘Flyover’ bad ‘Skywalk’ ki la don wat naduh shwa ba u Conrad un rung sha ka saiñpyrthei. Ngi sngewthuh ba kiba bun na ki nongïalam jong ka jylla ki shyrkhei bha ban phohsniew, hynrei ki duna pat ha ka liang ban pynurlong ïa kita bad namarkata, ki shu kut noh ha ka jingphohsniew ruma.
Ban pynurlong ïa kitei ki jingphohsniew kiba la shu kylla thymmai jait ba ka dei ka sorkar kaba la wan ha ka bor ha u bnai Lber, u Conrad u la ïathuh ba ka sorkar ka thmu ban leh bun tylli ki projek da kaba don bynta lang bun tylli ki tnat treikam naduh ka tnat Forest, PWD, MeECL, bad kiwei kiwei ki tnat na ka bynta ban pyndonkam lang ïa ki jaka jong ki. U la ai nuksa ruh ïa kawei ka jaka kaba dei jong ka tnat Forest ha Polo kaba dang lait bad khlem pyndonkam ha kaba la aiti mynta sha ka tnat Pynroi Sor na ka bynta ban pynwandur ïa ki jingtei ki ban long ki jingmyntoi bad yn lah ban leh ki jingpynitynnad bad ki jaka pynïeng kali. U Myntri Rangbah u la ong ba baroh ka thong ka long ban pynduna ïa ka jingkhapngiah bad ka dheng kali.
Ngi kynmaw ba katto katne snem mynshwa ha ka por ba u Dr Mukul Sangma u dang long kum u Myntri Rangbah, u la ïathuh ba ka sorkar jong u ka kwah ban pynwandur ïa ka Polo ba kan long kum kata ka Times Square kaba don ha nongbah New York. Hynrei haduh mynta, ka khlem urlong satia. Ha kajuh ka rukom, ka jingïakren ban tei ïa ki ‘Flyover’ bad ‘Skywalk’ ki dei kiba la slem bah. Ha kato ka por ba la ïakren, ka Shillong ka la khapngiah na ka jingbun palat ki kali. Mynta lei ka la nang kham palat.
Ka jingeh ha Shillong ban shna ïa kita ki ‘Flyover’ bad ‘Skywalk’ ka dei namar ka jingbym don jaka. Shibun bah ki jaka puta ha Shillong ki hap hapoh ka jingpeit jong ka Cantonment Board kaba dei jong ki shipai. Ngi ïohi ba ki shipai kim ju kham ai jaka na ka bynta ka jingmyntoilang jong ki paidbah. Ki ïaleh beit ban nang pynbun ïa ki kynroh bad ki jingpyrkhing namar ka jingsheptieng ïoh jia eiei. Ki sorkar ki la wan la leit, hynrei ki khlem lah ban ïakren sngewthuh bad ka Cantonment Board lane bad ka Tnat ïada Ri kumno ban ai jaka lem ban ïoh pynwandur ïa kitei ki jingphohsniew kiba la kylla long pynban ki jingphohsniew kynsha. U Conrad u don lang ha kajuh ka sorkar ha Delhi bad ka dei ka kamram jong u ban ïakren bad u Myntri ïada Ri, u Rajnath Singh, bad ban pynkohnguh ïa u ba dei beit ban ai jaka. U Conrad u la dei ban shim nuksa na uwei u Myntri Rangbah barim ka jylla, kata, u (Late) Bah EK Mawlong, uba la pyni da ka kam ha u snem 2000-2001 kumno ban pynïoh jaka na ki shipai ban tei ïa ki jingshna ki ban ai jingmyntoi ïa ki paidbah nongshong shnong.
Ban shu ïa phohsniew bad pynphohsniew ïa ki paidbah ka long kaba suk bha. Hynrei ban pyntreikam ka dei kaba eh na ka daw jong ka jaka. Ka jingeh ha kaba ïadei bad ka jingbym ïoh jaka kam dei tang ha Shillong, hynrei wat sha kiwei pat ki jaka jong ka jylla. Ngi sngewthuh ba tang ban pynheh surok ruh, ki nongshong shnong kiba bun kim kwah ban ai jaka namar lehse ka bai lutksan ba siew ka sorkar kam biang. Haba la thied rem ïa ka jaka shimet, mano pat ban die ha ka dor kaba tad? Don ruh kiba shu kwah ei ïa ki jaka ban ïoh pynïar ïa ki jingtei. Mano uta u ban shu ai ei kat ïa ka jaka? Namarkata, ngin ïa ai por ïa u Myntri Rangbah ba un pynurlong ïa kita ki jingphohsniew ka sorkar jong u, hynrei katba ym pat lah ban ïoh jaka, ka sorkar kan sa shu ïaid ruma hajuh shi hajuh.
