Imphal, Naitung:
Ka Karkinos Manipur Cancer Institute and Research Centre ka la pynlong ïa ka jingïalap paidbah ha ka sngi ba la rakhe ïa ka World Head and Neck Cancer Day kum shi bynta ban kyntu ïa ki briew ba ki la dei ban iehnoh ïa ka jingdih bad ka jingbam duma bad ai ka jinghikai pynsngewthuh sha ki shaphang kiba bun rukom jong ki jingpang bampong kiba ktah ïa ka khlieh bad ka ryndang, ïa ki dak ki shin jong ki bad ki lad kumno ban ïada na ka jingpang. Ka la don ruh ka jingbatai bad ka jingkhmih bniah ban lap kham kloi lada jia ba shah ktah na kane ka jingpang ha kane ka sngi ba la rakhe ïa ka World Head and Neck Cancer Day ba la leh ha ka Hospital kaba don ha Imphal.
U Dr. R.K. Gautamjit, Consultant-Head and Neck Oncosurgery, Karkinos Manipur Cancer Institute and Research Centre u la ong, “Ki lad ïada bad ka jinglap kloi halor ka jingpang ka long ka bynta kaba kongsan ban ïakhun pyrshah ïa ka jingktah jong ka jingpang bampong”.
Kumba ka paw, la ong ba ka jingpang bampong ha ka khlieh bad u ryndang ki la long ki jingbuh jingeh ïa ka ri ha kaba la antad ba ki la don lai pawa kiba ïoh ïa ka jingpang bampong ha kine ki bynta.
