Netherland, Naitung:
Kawei ka briew na Netherland ka la pynpaw pyrthei ba u khun jong ka u ioh ban thied ia ka suloi AK-47 na kawei ka website kaba pynpoi ruh da kaba suk ia katei ka suloi haduh ha iing.
Haba ïakren bad ki lad pathai khubor, ka Barbara Gemen, ka la iathuh ba u khun jongka u la ngop bad ioh mynsiem ha ki kam runar wat dang naduh kane ka rta bad kumta ruh khlem da pynslem ka la pyntip noh sha ki bor ba dei khmih khnang ba kin ioh ban tehlakam ia ki nongpynïaid jong katei ka website kaba sniew bad ban tehlakam ruh ia ki jingma kiba ap ia ka ri baroh kawei namar lada baroh ki riew paidbah ki ioh ban thied tiar siat da kaba suk ha katei ka rukom, ka jingma kaba khraw ka ap ia ka ri bad ka jaitbynriew baroh kawei.
Katei ka briew ka la iathuh ba u khun jong ka u la ngop ha ki kam thok- kam shukor ‘hacker’ ban leh thok bad peit tuh ia ki kam ki jam ki bym dei watla u dang don ha ka rta kaba dang rit bha bad kane ka long ka jingma ia ka iing- ka sem bad ia ka jingim jong u hi lada kam lah ban tehlakam bad pynbeit noh ia u naduh kane ka por.
Shuh shuh ruh ka la iathuh ba utei u khynnah rit u iadei kam lang bad kiwei de ki runar ‘hacker’ kiba phah ia u ban dawa pisa bad ban tuh pisa da ki rukom bapher. Hynrei kam shym poi pyrkhat ia kitei ki jingleh jong u khun jongka dei tang haduh ba kan da ioh pdiang ia katei ka suloi AK-47 ba la pynpoi haduh ha jingkhang iing jongka- ba kan sa sngewthuh ba u khun jongka u la ngop shisha ha ki kam runar kiba heh bad ka jingma kaba khraw kaba ap ia u bad ia ki paidbah nongshong shnong nangne shakhmat lada kam pynpaw paidbah noh ia katei ka jingleh bakla jong u ha kat katei ka rta.
