Washington, Naitung:
Ka United States ha ka Sngi Thohdieng ka la pynbna ia ka song jingiarap ba $345 Million sha ka tnat shipai jong ka Taiwan. Kane ka long hadien ka jingïakynad bad ka China halor ka jing-iadon bynta jong ki bor ba nabar bad ka Taiwan.
Katei ka song kan kynthup ia ki kuli, ki tiar siat bad kiwei- kiwei, kiba ka United States ka la mang na ka bynta ka tnat shipai jong ka Taiwan namar kumba la iohi bad sakhi ha kine ki khyndiat por ba la leit, ka Taiwan ka ap jingma bha na ka jing-leit syntiat bad jingleh don bor jong ka China la ka long shabar ne hapoh ruh jong u pud-u sam katei ka ri dewlynnong Taiwan.
Kumjuh ruh na ka liang jong ka tnat iada ka Taiwan, ka la ai khublei bad pdiang sngewbha ia kitei ki jingiarap jong ka United States na ka bynta ban pynbit pynbiang ia ki jingiada jong katei ka ri dew lynnong kaba rit.
Shuh shuh ruh ki heh ka Taiwan ki la pynbna ba ka Taiwan bad ka United States, kin nang iatrei lang shuh shuh nangne sha khmat naka bynta ban pynkhlaiñ ia ki jingiada hapoh Taiwan bad kumjuh ruh ban wanrah ia ka shongsuk- shongsaiñ hapoh jong katei ka ri kaba ap jingma na ka jing-leit thombor jong ka China.
Namar kumba la ju ïohsngew ruh na ka por- sha ka por, ba ka China ka ju kam trai ia katei ka dew lynnong bad ong ba ka Taiwan ka long hi ka bynta ba shu pait na ka China bad ba ka China kan sa pyniasoh biang ia katei ka bynta sha lade ynda ka la sngew donkam.
