Shillong, Naitung 31:
U Phrangki Buam mynta ka kynti u la wanphai biang sha ka Shillong Lajong Football Club na ka bynta ban ïashim bynta ha ka I-League jong ka aïom ban wan.
Kane ka long hadien saw snem ba kane ka kynhun ïalehkai ka la shah pynhiar kyrdan noh na ka I-League jong ka aïom ïalehkai 2018-19. Pynban mynta ka aïom kane ka klob ka la ïoh biang ïa ka lad ban ïashim bynta biang ha katei ka lympung.
Kat kum ki khubor ba la ïoh lum la ong ba kane ka jingwanrah biang ïa u Phrangki ka long na ka bynta ka kontrak kaba jlan namar u long u rangïalehkai uba tbit bad uba la ïoh ïashim bynta ha katto katne ki jingïalehkai ha ka lympung Indian Super League na ka FC Goa.
Kumba ka paw u Phrangki u dei u rangïalehkai uba la san napoh ka shlem ai jinghikai jong ka Sports Authority of India (SAI) STC Shillong. Hadien kata u la leit ïasoh sha ka Royal Wahingdoh FC kaba ïashim bynta ha kito ki por ha ka Shillong Premier League.
Hadien katto katne por utei u rangïalehkai shapdeng u la leit ïasoh sha ka Shillong Lajong bad u la sdang ban ïalehkai nyngkong eh ha ka I-League ha u snem 2018.
Kumba ka paw u Phrangki u la long u rangthep kol ba kynsai ha ka SPL bad u la wan ba-ar napdeng ki nongthep kol ha ka I-League 2018-19 da kaba ïoh ban thep 24 kol ha baroh ar ki lympung ïalehkai. U la ïadon bynta ruh ha ka Meghalaya State League na ka Shillong Lajong bad kaba la ïoh rah ruh ïa ka nam lahduh ha u 2019.
Hadien ba ka Shillong Lajong ka la shah pynhiar kyrdan noh ha ka I-League, u Phrangki u la leit pynïasoh da ka ram sha ka Bengaluru United ha ka aïom ïalehkai 2019–2020. Hadien kata u la leit ïasoh sha ka FC Goa ha ka aïom ïalehkai 2020–2023. Hadien kata une u rangïalehkai u la leit ïasoh da ka ram sha ka Mohammedan na ka bynta ka aïom ïalehkai 2021–2022.
Khatduh eh ha shwa ba un wanphai sha ka Shillong Lajong, u Phrangki u la pynïasoh sha ka Real Kashmir bad u la ïoh ban ïalehkai khyndai sien.
