Shillong, Naitung 31:
Ka lympung ïalehkai U-20 jong ka 4th Division Football League 2023 ba la pynïaid da ka Shillong Sports Association ka la bteng biang ha ka Lah Sngi U Blei ha kaba ki kynhun ki la ïasam mar shi point ha baroh ar tylli ki jingïakhun.
Ha ka jingïakhun kaba nyngkong hapdeng ka Nongkohlew SC bad ka Mawphlang SC ki la ïakhaid mar 1-1 kol. Wat la kine ki kynhun kim shym la lah ban thep kol ha ka kylla step, hynrei dei ha ka kylla miet ba ka Nongkohlew ka la ïoh ban thep kol nyngkong eh lyngba u Shain Mujai (53).
Katba na ka liang ka Mawphlang SC ka la lah ban pynphai kylla shi kol lyngba u Franky Synrem (70) na ka bynta ban ïakhaid mar shi kol.
Haba phai sha kawei pat ka jingïakhun hapdeng ka Mawreng SC bad ka Madanrting SC ki la ïakhaid mar shi kol. Ha kane ka jingïakhun ka Mawreng ka la pynkhih jar nyngkong eh lyngba u Nangbhabok Sohlang (15), hynrei ka Madanrting SC ka la lah ban pynïakhaid kylla lyngba u Nicholas Kshiar (45).
Kane ka lympung kan bteng biang ha ka Sngi Ba-ar hapdeng ka Lamlynti FC (Laitlyngkot) pyrshah ïa ka Riatsamthiah SC ha ka por 2 baje noh phai sngi, katba ka Umsohsun SC ïa ka Mawpdang SC ha ka por 4:15 janmiet.
