Jowai, Naitung 31:
Ka Mukhla Raij ka la khur ïa ka jingjop, katba ka Demthring bad ka Khimusniang ki la ïakhaid ha ka lympung ïalehkai Independence Day Cup Under-17 Football Tournament ba la pynïaid da ka West Jaiñtia District Sports Association (WJDSA).
Ha ka jingïakhun kaba la long ha ka Lah Sngi U Blei ha madan Kiang Nangbah Stadium Ladthadlaboh Jowai, ka Mukhla Raij ka la pynliem noh ïa ka Panaliar da 3-0 kol.
Tang mar ïasdang ka jingïakhun, ka Mukhla Raid ka la ïoh ban pynkhih jar nyngkong eh lyngba u Guidingstar Suna ha ka minit kaba 3. Une u rangïalehkai u la pynbud biang ïa ka kol kaba ar ha ka minit kaba 13. Kane ka kynhun ka la thep biang ïa ka kol kaba khatduh lyngba u Sanga Sumer ha ka minit kaba 42 na ka bynta ban khur syndon ïa ka jingjop.
Haba phai sha kawei pat ka jingïakhun hapdeng ka Demthring bad ka Khimusniang ki la ïasam mar shi ‘point’ hadien ba kim shym lah ban thep kol haduh kaba kut ka jingïalehkai.
