Moscow, Naitung:
Ka Russia ha ka Sngi U Blei ka la khang noh ia ka Kad Liengsuiñ jong ka hadien ka jingleit thombor jong ki drone ka Ukraine ha katei ka step.
Ka Russia ka la ioh ban siat pynhap noh ia kawei na ki drone ba la phah da ka Ukraine sha ki bynta jong katei ka nongbah ba khappud jong ka Russia bad Ukraine ha katei ka sngi. Katei ka drone ka la leit hap sha ka ïing mala kaba ju pyndonkam kum ka ophis treikam, hynrei ym shym don ba mynsaw ne ngat ha katei ka jinghap ka drone ha katei ka ïingmala ha katei ka sngi.
Ka Moscow bad ki nongbah ba marjan jongka, ki don kumba 500 kilometre lane kumba 310 miles na khappud jong ka Ukraine bad kitei ki nongbah ki long kiba ap jingma na ka thma bad ka Ukraine.
Katei ka jingleit thombor ki drone ka Ukraine ka la jia ha ka step Sngi U Blei bad ka long ruh ka jingthombor kaba hadien duh ba ka Ukraine kan leit thombor sha Kremlin bad sha ki shnong khappud jong ka Russia bad Ukraine.
Na ka liang ka tnat iada jong ka Russia, ka la khot ia katei ka jingleit thombor jong ka Ukraine kum ka kam thombor ki lehnoh bad ka la byrngem shuh shuh ruh ba kan nang pynjur ia ka jingthombor bad jingpynhiar kput khlem jingmap.
Ha katei ka step, ki bor pahara ka Russia ki la ioh siat pynhap noh ia kawei ka drone UAV jong ka Ukraine hapoh jong ka distrik Odintsovo jong ka nongbah Moscow hi.
Ki heh ka Russia ki la iathuh ba ym shym don ba ngat ne mynsaw na katei ka jingleit thombor jong ka Ukraine sha Russia ha katei ka sngi.
Tang hadien katei ka jingjia hi, ki bor pyniaid ka Vnukovo Airport ki la pynbna ba la khang khyrdep noh shwa shipor ia katei ka kad liengsuiñ namar ki jingma kiba ap ia ki paidbah lada yn bteng bad pyniaid shakhmat ia ki kam kumba ju leh barabor.
Hynrei la ong pat ba tang hapoh shi kynta, la iohi ba ka jinglong- jingman ha Russia baroh ka la iaid beit- iaid ryntih kumba ju long man ka por bad kam don jingma shuh na ki jingthombor jong ka Ukraine.
Kane ka jingleit thombor jong ki drone ka Ukraine sha Russia ha kane ka por, ka long ruh hadien katto katne taiew ba ka Ukraine ka la byrngem ban knieh biang noh ia baroh ki bynta kiba la kam trai bad kurup da ka Russia naduh ba sdang ka thma.
Hynrei na ka liang ka tnat iada jong ka Russia, ka la ong ba kum kitei ki jait kam thombor jong ka Ukraine, kin ym lah ban jia khlem ka jingai jingkyrshan jong ki bor ba nabar ka Ukraine kum ka Us bad ki dkhot ka NATO.
