Peshawar, Naitung:
Kumba 44 ngut ki briew ki la khlad noh bad da ki spah ngut kiba mynsaw na ka jingbthei bom ha ka jaka ialum paidbah ha Pakistan ha ka Sngi U Blei, kaba la pyniaid da ka seng Islamic Party sha ka phang North jong ka Pakistan.
Katei ka kam thombor ka dei kaba la thmu pyrshah ia ka seng Jamiat Ulema-e-Islam-F (JUI-F) hadien ba la iohi ia ki spah ngut ki nongkyrshan jong katei ka seng kiba ialum paidbah hapoh ka shnong Khar, hajan khappud bad ka Afghanistan.
La ong ba katei ka ïing ba ki pynlong jingialang ha katei ka sngi, ka la khyllem bad kyllon sha ka bynta ba don ka jaka mih ha kaba ki paidbah kiba iadon baroh ki dang pyrshang ban phet krad na katei ka jaka.
Ha katei ka sngi, la iohi ia shibun tylli ki metiap ba la saphriang kylleng jong katei ka jaka ha kaba ki kti, ki kjat bad ki dkhot met bapher ki la saphriang sawdong katei ka jaka.
Ki katto katne kiba lait im na katei ka jingjia ki iathuh ba hadien ka jingbthei kaba jur ha katei ka sngi, ki khie na ka jaka ha kaba ki iathiah lang bad kiwei pat ki metiap kiba la dkut kti- dkut kjat bad ka lyer ha katei ka jaka ka dap da ka jingsma doh briew namar ka jingpluh bad jing ingkhong jong ki briew kiba ngat ha ka jingbthei jong utei u bom.
Katba ha ka janmiet jong katei ka sngi, u heh ka tnat ka koit ka khiah u la pyntip ba kumba 40 tam ki la khlad hashen bad palat 100 ngut kiba la mynsaw na katei ka jingbthei bom.
