Jowai, Naitung 31:
Ka Lumchyrmang Mihmyntdu bad ka Ïooksi SC ki la khur jingjop ha ka lympung ïalehkai 3rd Division Football Tournament na ka bynta ka 3rd Adelbert Laloo Memorial Trophy ba la pynïaid da ka West Jaiñtia District Sports Association (WJDSA).
Ha ka jingïakhun kaba la long ha ka Lah Sngi U Blei ha madan Kiang Nangbah Stadium, Jowai, ka Lumchyrmang Mihmyntdu ka la pynliem noh ïa ka Loompyrdi Ïongpiah da 3-1 kol.
Ha katei ka jingïakhun ka Lumchyrmang ka la ïoh ban pynkhih jar nyngkong eh lyngba u Sooki Chyrmang ha ka minit kaba 24. Hadien shiteng kynta jong ka jingïakhun ka Loompyrdi Ïongpiah ka la lah ban pynphai kylla lyngba u Salan Passah ha ka minit kaba 31.
Hadien katto katne por ba la bteng biang ïa ka jingïakhun jong ka kylla miet ka Lumchyrmang ka la thep biang sa ar kol lyngba u Ohi Dkhar ha ka minit kaba 52 bad u Wanphi Chyrmang ha ka minit kaba 59 na ka bynta ban khur syndon ïa ka jingjop.
Haba phai sha kawei pat ka jingïakhun, ka Ïooksi SC ka la pynliem ïa ka Lumsliarsliar da 2-0 kol. Ïa kine kol la thep da u Pyrshang Tangliang ha ka minit kaba 44 bad u Ngaitni Syngkon ha ka minit kaba 58.
