Mawkyrwat, Naitung 31:
Ka shnong Nongmluh ka long kawei na ki shnong kaba don ha kyndong eh jong ka South West Khasi Hills Distrik. Kane ka shnong ka don sharum ka shnong Wahkaji bad Phlangdiloin kaba hap hapoh ka Hima Langrin Syiemship bad kaba jngai kumba 57 km eiei na Mawkyrwat.
Wat la kane ka shnong ka don sha kyndong eh jong ka distrik, hynrei kane ka shnong ka long kaba riewspah ha ka jingitynnad ka mei mariang ha ka jingdon ïa ki lum ki wah, ki kshaid ba itynnad, ki krem ki kroh ki riat ki ram, ki mawbynna bad ki maw kiba phylla uba U Blei nongbuh nongthaw uba la buh kyrpang ha kane ka jaka.
Ha kane ka shnong yn lap ïa kawei ka krem kaba itynnad kaba kyrteng ka krem Langlu bad katkum ka jingïathuh ki tymmen hyndai ki ong ba ha kane ka krem mynshwa ka shait don ka dngiem Langlu bad la ïathuh ruh ki mard ki mreng ruh ki ju wan dih ïa ka um mluh na kane ka krem bad dei na kane ka krem ba sa ïoh ïa ka kyrteng shnong Nongmluh.
Harud jong kane ka krem ka don ruh kawei ka kshaid kaba itynnad bha ryngkat bad ka thwei.
Ym tang katta, ha kane shnong ki don ruh ki maw kiba wan dur ha ka dur jong ki lieng kaba ka mei maraing ka la pynwandur, hynrei kaba sngewsih ka long ba kine ki maw lieng mynta na ka daw ka jingbym sumar ki la sdang ban jot bad pra.
Nalor kine ki mawlieng, ki don ruh ki maw kiba syrïem bad ki dohnud kiba ju khot ki mawdohnud bad ïa kine ki maw lah ban ïohi bha ha ka por tlang ha ka por ba duna um.
Nalor kine ha kane ka shnong ki don ruh shibun tylli ki mawbynna kiba itynnad kiba ki tymmen hyndai ki ju shong jah thait ha ka por ba ki leit ïew leit hat, hynrei kaba sngewsih ka long kine ki maw jahthait mynta ruh ki la sdang ban jot bad pra.
Ym tang ki jingthaw phyla, kane ka shnong ka don ruh ïa ki jaka jngoh kai kiba itynnad bad na kane ka jaka jngoh lah ban ïohi kyndiang ïa ka Bangladesh, ka shnong Nongnah, Ngunraw bad kiwei kiwei bad hapoh kane jaka jngoh kai ka don ruh ka kshaid Tawleng bad lehse lada ka sorkar lyngba ka tnat kam jngohkai lada ka shimkhia lehse ka lah ban long kawei na ki jaka jngohkai kaba khring bha ïa ki nongjngohkai pyrthei.
Kumta na ka liang ki bor pynïaid shnong naduh u sordar u Bah P Syiemiong bad u Bah BS hangdiar, Secretary shnong bad lem bad ki trai jaka ki da angnud eh ban pynlong ïa kane ka shnong kum kawei na ki jaka jngoh kum shibynta ban kyntiew ïa ka kam jngohkai hapoh ka dong ka thaiñ.
Ha kajuh ka por ki buh ka jingkyrpad ïa ka sorkar bad u nongmihkhmat ba kin shimkhia lem ban pynitynnad shuh shuh ïa kane ka jaka namar ki lynti ki syngkien ki dang khohruh khohram kum ki lynti ïaid kjat sha ka krem, ki jingker ha ka jaka jngoh ne view point bad kiwei kiwei khnang ba kan long kawei na ki jaka jngohkai kaba itynnad bad ka ban khring ïa ki nongwan jngohkai pyrthei.
