La ïoh jaka ban tei ïa u motdur U Tirot Sing ha Bangladesh & yn ainam ïa ka Library ha ka kyrteng jong u

U la ong ba ka jingïoh ban tei bad khamtam ban ai kyrteng ha U Tirot Sing ïa ka thiar kynshew kot jong ka IGCC ka dei kaei-kaei kaba khraw tam.

Shillong, Naitung 31:

Ka jingtei ïa u motdur jong U Tirot Sing ha Bangladesh shen kan sa sdang noh bad ka jingtei kan dei ha ka jaka ba don ka Indira Gandhi Cultural Centre (IGCC) ha nongbah Dhaka ha kaba ïa ka thiar kynshew kot (Library) jong ka IGCC yn sa ainam noh ha kyrteng U Tirot Sing bad yn tip noh kum U Tirot Sing Memorial Library.

Ka thiar kynshew kot ka IGCC ka don ha kawei ka jaka kaba tip kum ka Dhanmondi, bad ka jingainam ïa katei thiar kynshew kot ha ka kyrteng U Tirot Sing kan pynphriang ïa ka khana bad kiei kiei kiba la ieh shadien kum uwei na ki ’riew ïakhun ban tip pateng la pateng.

U Myntri ka tnat Lariti ka Sorkar Jylla, u Bah Paul Lyngdoh u la ïathuh ba ha ka 4 tarik Naitung, 2023 u la thoh shithi sha u High Commissioner ka India ha Bangladesh, u Pranay Verma halor ka jingtei ïa u motdur U Tirot Sing ha IGCC, Dhaka.

Kumta na ka liang u Verma u la phah ïa ka shithi kum ka jubab ha ka 25 tarik Naitung, 2023 ha kaba u la pyntip ba ka High Commission ka India ha Dhaka ka la pynsngew sha ka tnat bar ri ka India halor ka jingkongsan ban tei ïa u motdur U Tirot Sing ha IGCC, Dhaka.

U Verma u la pyntip sha u Bah Paul ba ka Sorkar Meghalaya kan phah briew ban ïatreilang bad u Director ka IGCC, Dhaka na ka bynta ka jingpynbit pynbiang ïa u motdur U Tirot Sing bad ban tei ïa u motdur khnang ba yn sa ïoh ruh ban plie.

U Bah Paul u la ong ba la kumno-kumno la khmih lynti ba mynta u snem ha u Nohprah, yn sa pyndep ïa ka jingtei ïa u motdur U Tirot Sing bad yn sa ïoh ban plie noh.

U la ong ba ka jingïoh ban tei bad khamtam ban ai kyrteng ha U Tirot Sing ïa ka thiar kynshew kot jong ka IGCC ka dei kaei-kaei kaba khraw tam.

U la ong yn sa ïalam lang katto katne ki Syiem bad nongsynshar na Meghalaya ha ka sngi ba plie ïa u motdur jong une u ’riewïaleh ka Jaitbynriew.

Kum ban pynkynmaw, ha ka por ba u Bah Sanbor Shullai u la long u Myntri ka tnat Lariti, u la maitphang ïa kane bad ha ka por jong u Bah Paul mynta kane ka kam ka la ïaid shakhmat ban pynurlong.