Shillong, Naitung 31:
Naduh ki taïew ba la dep ka la don ka jingïakren shaphang u Kylian Mbappe sha kano ka lympung ïalehkai kaba un sdang ïa ka jingïalehkai kaba nyngkong ha ka taïew ban wan.
Ka la don ka jingïakren la un dang ïai sah ha ka PSG ne un leit sha ka Real Madrid lane un leit ïalehkai noh sha kawei na ki klob na Saudi Arabia ka Al-Hilal.
Kumba ka paw utei u rangïalehkai shakhmat na France um shym la don jingthmu ban leit ïalehkai sha Saudi Arabia. Ïa mynta u Kylian Mbappe u dang kilanmet marwei ha la ïing namar ki para nongïalehkai ka PSG ki dang don hapdeng ka jingleit ïalehkai shabar.
Kat kum ki tyllong khubor, la ong ba ka Liverpool ka la don hapdeng ka jingïakren bad ka PSG na ka bynta ban shim wai shi snem ïa u Mbappe.
Dangshen u Mbappe u la kyntait ïa ka rekod halor ka jingsiew kaba £259m na kawei klob jong ka Saudi Pro League ka Al-Hilal ba un wan ïasoh sha kane ka klob na ka bynta shi aïom.
U Mbappe u la ïoh ban ïakren bad ka Liverpool halor ka jingleit ïasoh ha shwa ba un mih noh na ka PSG kaba u la pynïasoh naduh u 2018. Kane ka dei na ka daw ba ka la mih ka kynrum kynram bad ka kynhun ïalehkai jong u Jurgen Klopp.
“Ngi la ïoh ban ïakren kumba katto katne por, hynrei kam da dei eh kaba slem,” la pynpaw utei u rangïalehkai.
“Ngi la ïakren kumba katto katne por. Nga la ïakren bad ka Liverpool namar ka dei ka klob kaba nga ju sngewtynnad eh.
“Ngam tip balei, hynrei ka dei ka klob kaba nga da sngewtynnad bad nga la ïakynduh teng bad ki bor pynïaid ha ki san snem mynshwa ha ka por ba nga dang don ha Monaco.”
Kumba ka paw ka PSG ka kwah ban pynlaitluid noh ïa u Mbappe hadien ka aïom ka ban wan khlem kino-kino ki kyndon ïa utei u rangïalehkai.
U Mbappe u la dep ban ïakren bad ka PSG ba um kwah ban bteng sa 12 bnai ïa ka kontrak ka jong u, ka ban kut ha kaba kut u Jylliew jong u snem ban wan.
Nalor kata, u la pynpaw shai ba u thmu ban ïalehkai sa tang shi aïom bad katei ka lahduh na France bad hadien kata un sa mih noh.
