Shillong, Naitung 31:
U President barim ka Wrestling Federation of India Chief bad uba la bat haduh hynriew sien kum u MP na ka seng BJP u Brij Bhushan Sharan Singh u la shah kynnoh ba u la thmu ban pynïaid biang ïa ka synjuk ïalehkai lyngba ki nongkyrshan kiba don haduh 18 ngut, hadien ba ki la dep ban thep kyrteng ha ka Lah Sngi U Blei na ka bynta ka ilekshon jong ka WFI.
Ka kynhun jong u Brij Bhushan Singh ka kynthup na ka bynta kawei kyrteng jong ka kam President, hynriew na ka bynta ka kam vice president, hynñiew ki kyrteng na ka bynta ki executive member, ar ki kyrtong na ka bynta ka kam joint secretary, kawei na ka bynta ka kam secretary general bad kawei na ka bynta ka kam treasurer jong kane ka synjuk ïalehkai.
U Singh, uba la shah kynnoh jrong kti ïa ki kynthei ha ki khlur nongïalehkai ïalympat, ha ka Lah Sngi U Blei u la ong ba ym don na ki bahaïing jong u ki ban ïashim bynta ha kane ka ilekshon jong ka synjuk ïalehkai, hynrei u la ïai ban da kaba ong ba ka kynhun jong u ka don ïa ki nongkyrshan kumba 22 na ki 25 tylli ki synjuk ïalehkai jong ki jylla bapher bapher.
Kane ka sngi Nyngkong ka dei kaba khatduh ban thep kyrteng na ka bynta ka ilekshon ka ban long ha ka 12 tarik mynta u bnai.
Ki hynriew ngut ki khlur nongïalympat kiba la khur takma ha ka Olympic ki kynthup ia u Bajrang Punia bad ka Sakshee Malikkh, ka Vinesh Phogat kaba la khur ïa ka takma ksiar ha ka Asian Games, ki kynnoh halor ka jingjrong kti ïa ki kynthei da utei u MP ka seng BJP. Ki la shong kyllaiñ mynngor ha Jantar Mantar kaba ha ka nongbah Delhi.
Kumba ka paw u Singh un ym lah shuh ban ïashim bynta ha katei ka ilekshon namar u la bat haduh 12 snem kum u khlieh duh jong katei ka synjuk ïalehkai namar ka dei kaba khatduh eh ban bat kumba la shah kat kum ka National Sports Code.
Ha ka 20 tarik u Naitung, u Singh u la ïoh jamin na ka iingbishah jong ka Delhi halor katei ka jingshah kynnoh jrong kti ia ki kynthei.
Te kumta ïa ki kam ki jam jong ka WFI ïa mynta la nang pynïaid da ka ad-hoc committee hapoh ka jingïalam u Bhupender Singh Bajwa hadien ba la thung da ka Indian Olympic Association.
Ïa ka jingbishar bniah ïa ki kot ki sla yn pynlong ha ka 2 tarik bad ki kyrteng kiba khatduh yn sa pynbna ha ka 7 tarik u Nailar bad ïa ka ilekshon yn pynlong ha ka 12 tarik.
